Вакыйгалар хроникасы


Минтимер Шәймиев: "Һәркемне бәрәңге белән тәэмин итәчәкбез!"

4 октябрь көнне Минтимер Шәймиев Казанның авыл хуҗалыгы ярминкәләрендә булды. Аны ТР Премьер-министры урынбасары – авыл хуҗалыгы һәм азык-төлек министры Марат Әхмәтов һәм Казан мэры Илсур Метшин озатып йөрде.

Республика башлыгы иң әүвәл Татарстан башкаласының Чехов базарындагы сәүдә рәтләрен карады. Биредә кешеләр кышка азык-төлек запасы тупласын өчен бөтен уңайлыклар да тудырылган. Базарда чагыштырмача арзан бәягә сатып алынган бәрәңге, шикәр комы, он һәм башка тауарларны махсус йөкчеләр теләге булган һәркемнең шәхси автомобильләренә кадәр илтте. Үз машиналары булмаган кешеләргә исә алган әйберләрен бушлай өйләренә китерделәр.

Кайнар ризык пунктларында пылаудан авыз итү, тәмле бәлешләр белән чәй эчү мөмкинлеге тудырылган иде. Ә сәхнәдә Татарстан районнарының үзешчән коллективлары чыгыш ясады.

Ярминкәдә авыл хезмәтчәннәре шәһәрдә яшәүчеләргә үтемле бәядән төрледән-төрле продукция тәкъдим итте. Мисал өчен, бәрәңгенең килограммын – 6-7, кишерне – 8-12, кәбестәне – 7-8, чөгендерне – 8-14, башлы суганны 8-12 сумга сатып алырга мөмкин иде. Он, ашлык (арыш, арпа, солы), яшелчә, яңа тотылган балык, ит, тавык, үрдәк, каз, үсентеләрнең киң ассортименты тәкъдим ителде.

Бүген 500дән артык йөк машинасы Казандагы ярминкәләргә төрледән-төрле авыл хуҗалыгы продукциясен алып килде. Бер көн эчендә ярминкәләрдә 50 миллион сумлык тауар сатылыр дип көтелә. Чагыштыру өчен: 27 сентябрьдә узган ярминкәдә – 40,4 миллион, ә 20 сентябрьдә 33,9 миллион сумлык продукция сатылган иде.

Минтимер Шәймиев Чехов базарындагы сәүдә рәтләрен караганда Татарстанның төрле районнарыннан килгән сатучылар һәм төрле яшьтәге сатып алучылар белән аралашты. ТР Президенты тауарның кайдан китерелүе, бәяләр белән кызыксынды, сатып алучылардан кайсы тауарга сорау аеруча зур булуын белеште.

Чехов базарының түбәсе ябулы бинасында ТР Президенты сәүдә рәтләрен карады, бәяләр һәм хәләл итнең булу-булмавы белән кызыксынды. Бу көнне яшелчәләр рәтендә баклажанның килосын – 50, помидорны – 75, борычны 45 сумнан сатып алырга мөмкин иде.

Ачык һавада корылган сәүдә рәтләре янына чыккач, республика башлыгы сатуга югары сортлы он (25 килограммы – 280, 50 килограммы 550 сум) алып килгән “Вамин-Татарстан” холдингының йөк машиналарын карады. Күп санлы он капчыклары арасында хатын-кыз һәм ир-ат итекләре (430 һәм 450 сум) сату ноктасы өчен дә урын табылган. Минтимер Шәймиев итек сатучы белән аралашты һәм әлеге аяк киемен мактады. “Кышын дачада үзем дә итек киеп йөрим, бик уңайлы”, - диде ул.

Базарда сатылучы үсентеләрне караганда, республика башлыгы әлегә республика бакчачылырының бик азы гына чикләвек куагы утыртуына игътибар юнәлтте. ТР Президентының сүзләренә караганда, бу куакның чикләвеге бик файдалы, ә куакның үзе бик талымсыз һәм тәрбия таләп итми диярлек.

“Мондый кояшлы көндә бәрәңге сатып алу бик әйбәт. Кояшны “күргән” бәрәңге бик озак саклана”, - диде Минтимер Шәймиев, бәрәңге төялгән йөк машинасы янында. “Һәркемне бәрәңге белән тәэмин итәчәкбез! Монда бернинди шик тә юк”, - дип ассызыклады ТР Президенты.

Чехов базарындагы сәүдә рәтләрен караганнан соң Минтимер Шәймиев “Парк Хаус” сәүдә-күңел ачу комплексы янында оештырылган, башлангыч һәм урта һөнәри белем бирү учреждениеләре, гомумбелем бирү мәктәпләре, өстәмә белем бирү һәм мәктәпара уку комбинатларында укучылар тарафыннан җитештерелгән әйберләр һәм авыл хуҗалыгы продукциясен сату ярминкәсендә булачак.


2008 елның 4 октябре




Шулай ук кара