Вакыйгалар хроникасы


Минтимер Шәймиев Рафис Хәбибуллинга һәм Дәүфит Хәмәдишинга погоннар тапшырды

16 декабрьдә Татарстан Республикасы Президенты Минтимер Шәймиев Казан Кремлендә, РФ Президенты Указы нигезендә, Гражданнар оборонасы һәм гадәттән тыш хәлләр министры Рафис Хәбибуллинга "эчке хезмәт генерал-майоры" һәм Җәзаларны үтәтү федераль хезмәтенең ТР буенча Баш идарәсе башлыгы Дәүфит Хәмәдишинга "эчке хезмәт генерал-лейтенанты" званиеләре погоннарын тапшырды.

Минтимер Шәймиев яңа званиеләргә лаек булган Рафис Хәбибуллинны һәм Дәүфит Хәмәдишинны дәүләт бәхете өчен тугрылыклы хезмәтләре өчен тәбрикләп: "Кешене һәрвакыт хөрмәткә лаеклы эшләре таныта", - дип билгеләп узды.
Рафис Хәбибуллин 1963 нче елның 2 октябрендә Апас районы Пучинке Енай авылында дөньяга килә. СССР Эчке эшләр министрлыгының Омски югары милиция мәктәбен, Россия Эчке эшләр министрлыгының Идарә академиясен тәмамлаган. Хезмәт эшчәнлеген 1984 елда, Совет Армиясе сафларында хезмәтен тәмамлаганнан соң, Апас районы эчке эшләр бүлегендә милиционер вазифасында башлап җибәрә. Рафис Хәбибуллин II дәрәҗәдәге "Ватан алдындагы казанышлары өчен" орден медале белән бүләкләнгән.

Дәүфит Хәмәдишин 1959 нчы елның 1 гыйнварында Мөслим районы Баек авылында дөньяга килә. Эчке эшләр органнарындагы хезмәте, 1980 елда, Яр Чаллы шәһәре эчке эшләр идарәсе патруль-пост хезмәте полкында аерым рота милиционеры вазифасында башланып китә. 1987 елда СССР Эчке эшләр министрлыгы академиясен тәмамлый. Шулай ук II дәрәҗәдәге "Ватан алдындагы казанышлары өчен" орден медаленә ия.


2008 елның 16 декабре