Вакыйгалар хроникасы


Казан Кремлендә дару бәяләрен җайга салу мәсьәләләре хакында фикер алыштылар

3 сентябрь көнне Казан Кремлендә узган очрашуда дару бәяләрен җайга салу мәсьәләләре хакында фикер алыштылар.

Әлеге мәсьәлә буенча фикер алышуда Татарстан Президенты Минтимер Шәймиев, тарифлар буенча Федераль хезмәт җитәкчесе Сергей Новиков, ТР Премьер–министры Рөстәм Миңнеханов, Россия Хөкүмәтенең Социаль үсеш һәм әйләнә–тирә мохитне саклау департаменты директоры Нелли Найговзина һәм башка рәсми затлар катнашты.

Казан Кремлендәге очрашу бу минутларда “Корстон”да узучы “Россия Федерациясендә дару бәяләрен җайга салу” дигән Бөтенроссия киңәшмәсе алдыннан үтте. Сергей Новиковның сүзләренә караганда, форумда илнең барлык төбәкләреннән килгән 400 дән артык белгеч катнаша. Бу карала торган мәсьәләнең әһәмияте зур булуы хакында сөйли, дип саный ул.

Үз чиратында, Минтимер Шәймиев әлеге Бөтенроссия киңәшмәсен үткәрү урыны итеп Казанны сайлаганнары өчен форумны оештыручыларга рәхмәт белдерде. ТР Президентының фикеренчә, бу мәсьәлә буенча ил җитәкчелегенең инициативасы Казанда тормышка ашты, актив гамәлләр кылырга яхшы сигнал булды.

Нелли Найговзина билгеләп үткәнчә, дарулар халыкның яшәү сыйфаты һәм гомер озынлыгы мәсьәләсендә әһәмиятле роль уйный. “Шунлыктан даруларның бәясе һәм сыйфатына бәйле мәсьәләләр аеруча мөһим”, – диде ул.

Аның фикеренчә, Россиядә дару бәяләрен дәүләти җайга салуда билгеле бер тәҗрибә тупланган. Төбәкләрнең уңай тәҗрибәсен гомумиләштерергә вакыт җитте, дип саный департамент башлыгы.

“Дарулар белән тәэмин итү мәсьәләсен хәл итми торып, медицина ярдәменең сыйфаты, Россия Хөкүмәте тарафыннан куелган халыкның сәламәтлеген яхшырту, гомер озынлыгын арттыру, авырулар санын киметүгә бәйле бурычларны хәл итү турында сүз алып бару мөмкин түгел”, – дип ассызыклады Нелли Найговзина.

Минтимер Шәймиевнең сүзләренә караганда, Татарстанда Тарифлар комитеты үз эшен камилләштерүне дәвам итә. “Бездә тәҗрибә, проблеманы күзаллау бар. Сез безне ишетәсез, димәк, уртак эш уңышлы барачак”, – диде ТР Президенты.

Искәртеп узабыз, элегрәк ил җитәкчелеге дару бәяләрен җайга салу мәсьәләсен берничә мәртәбә күтәреп чыкты. Мисал өчен, киңәшмәләрнең берсендә Россия Премьер–министры Владимир Путин беренче яртыеллыкта дару бәяләренең 18,3 процентка артуын билгеләп үтте.

Россия Хөкүмәтенең “Тормыш өчен кирәкле һәм мөһим даруларга бәяләрне дәүләти җайга салуны камилләштерү турында”гы карары 8 августта кабул ителде.

Ил Хөкүмәтенең кризиска каршы программасы кысаларында дару бәяләренең артуына каршылык күрсәтү буенча чаралар комплексы эшләнде. Беренче чиратта, әлеге чаралар тормыш өчен кирәкле һәм мөһим дарулар исемлегенә керүче препаратларга кагылачак.


3 сентябрь 2009 ел.