Вакыйгалар хроникасы


Минтимер Шәймиев: “Ефәк юлы” республикада спортның зур үсеш алуын күрсәтә”

5 сентябрь көнне Казанда “Татнефть–арена” каршындагы мәйданда “Ефәк юлы – 2009” Халыкара ралли–рейды тантаналы төстә ачылды.

Узышта катнашучылар һәм тамашачыларны Татарстан Президенты Минтимер Шәймиев, Россия спорт, туристлык һәм яшьләр сәясәте министры Виталий Мутко, Төркмәнстанның туристлык һәм спорт буенча дәүләт комитеты башлыгы Гурбанмәммәт Элясов, “Дакар” директоры Этьен Лавинь сәламләде. Тантанада шулай ук “КАМАЗ–Мастер” командасы составында узышта катнашучыларның берсе – ТР Премьер–министры Рөстәм Миңнеханов, “КАМАЗ” ААҖ генераль директоры Сергей Когогин, Казан мэры Илсур Метшин һәм башкалар катнашты.

Рәсми затларның котлау сүзләре алдыннан “Татнефть–арена” каршындагы сәхнәдә биючеләр ут өертте, спортның экстремаль төрләре вәкилләре – байкерлар, һава гимнастлары, акробатлар һәм канатта йөрүчеләр чыгыш ясады. Сценарий авторлары 2013 елда Казанның Бөтендөнья универсиадасын кабул итәчәген дә онытмаган иде. Иң соңыннан сәхнәгә вәкилләре “Ефәк юлы” ралли–рейдында катнашучы илләрнең 25 флагын алып чыктылар. Тантананы Дмитрий Губерниев һәм Валерий Хлебутин алып барды.

Татарстан Президенты Минтимер Шәймиев үз чыгышында республика территориясендә “Ефәк юлы–2009” ралли–рейдына старт бирү турындагы карарның гаять зур әһәмияткә ия булуын ассызыклады. Татарстанлылар исеменнән ул әлеге Халыкара чараны хуплап каршы алган Россия, Казакъстан һәм Төркмәнстан Президентларына рәхмәт белдерде.

“Ефәк юлы” республикада спортның зур үсеш алуын күрсәтә, – дип билгеләп үтте Минтимер Шәймиев. – Дөрестән дә, Казан – спорт башкаласы, ә Татарстан спорт республикасына әверелә. “Ак Барс”, “Рубин”, УНИКС, “Зенит”, “Синтез”, “КАМАЗ–Мастер” командаларының җиңүләре булмаса, республикабызда бүгенге искиткеч вакыйга да булмас иде. Без булдырабыз!”.

Минтимер Шәймиев раллида катнашучыларның барысын да уңышлар теләп калды. ТР Президенты фикеренчә, “Ефәк юлы” – экипажлар өчен ике бөек мәдәният – көнбатыш һәм көнчыгыш мәдәниятләре очраша торган территорияләр буйлап узу мөмкинлеге ул.

Ралли директоры, “Париж–Дакар” раллиеның биш мәртәбә җиңүчесе, “КАМАЗ–Мастер” командасы җитәкчесе Семен Якупов Татарстан Президентына истәлекле кубок бүләк итте.

Тантана раллида катнашучы командаларны тәкъдир итү белән дәвам итте.

15.00 сәгатьтә 2013 елда Казанда узачак Универсиада хөрмәтенә раллиның 2013 метр озынлыгындагы супер махсус участогында ярышта катнашучыларга старт биреләчәк. 18.00 сәгатьтә “Чыңгызхан” төркеме катнашында бәйрәм концерты башлана, ул фейерверк белән төгәлләнәчәк.


МА "Татар-информ", 5 сентябрь, 2009 ел.