Вакыйгалар хроникасы


Студентлар отрядларын дәүләт заказы белән тәэмин итәргә кирәк, дип саный ТР Президенты

Студентлар хезмәт отрядларын дәүләт заказы белән тәэмин итәргә кирәк. Бу хакта 8 сентябрь көнне Казан Кремлендә ТРның әйдәп баручы вузларының ректорлары белән узган киңәшмәдә Татарстан Президенты Минтимер Шәймиев белдерде.

Кризис чорында, бигрәк тә яшьләргә уку өчен акча эшләргә, гаиләгә матди ярдәм күрсәтергә кирәк булганда “Студентлар төзелеш отрядларының эшен оештыру турындагы” мәсьәлә буенча фикер алышу актуаль булып тора. Ә республикада, бигрәк тә 2013 елгы Универсиада алдыннан спорт объектлары төзелешендә катнашу - Казанда булачак Уеннарга әзерләнүгә кушылу мөмкинлеге дә. Минтимер Шәймиев билгеләп үткәнчә, 2013 елгы Универсиаданың күп кенә объектлары вузлар каршында төзелә. Шулай итеп, университет каршындагы спорт комплекслары төзелешендә катнашып отряд әгъзалары бер үк вакытта өстәмә күнекмәләр ала.

Минтимер Шәймиев шулай ук студентлар хезмәт отрядларына ярдәм күрсәтергә кирәклегенә игътибарны юнәлтте. “Безгә студентлар отрядлары өчен төрле юнәлештә дәүләт заказлары формалаштырырга кирәк, - дип саный ТР Президенты. - Барлык юнәлешләр буенча да ихтыяҗ бар, шулай итеп бөтен өлкәне дә колачларга кирәк”.

ТР яшьләр эшләре, спорт һәм туризм министры Марат Бариев үз чыгышында 2001 елдан башлап 2009 елларда студентлар хезмәт отряды эшчәнлегендә 50 меңнән артык студент һәм эшсез яшьләр катнашкан, дип белдерде. Министр сүзләренчә, 2003 елда республикада 4,5 мең кешедән торган 160 отряд формалашкан булса, агымдагы елда 200 отряд оештырылган, анда 8 мең студент хезмәт куйган. Эшчәнлекнең традицион юнәлешләреннән тыш (төзелеш, балалар лагерьларында, авыл хуҗалыгы, төзекләндерү) студентлар хезмәт отрядларының Республика үзәге тарафыннан илнең көньяк төбәкләрендә эшләү өчен студентлар археология, экология, медицина отрядлары оештырылган. Отряд әгъзаларының хезмәт хакы эшчәнлекнең юнәлешенә карап 4,5-14 мең сум тәшкил итә.

Марат Бариев билгеләп үткәнчә, быел Казанда 2013 елда булачак Бөтендөнья җәйге Универсиада объектларын төзелешендә катнашучы студентлар төзелеш отрядлары үсеш алды.

ТР төзелеш, архитектура һәм торак-коммуналь хуҗалык министры Марат Хөснуллин студентлар хезмәт отрядларында катнашучыларның квалификациясе мәсьәләсенә игътибарны юнәлтте. Министр сүзләренчә, 2010 елның 1 гыйнварыннан башлап төзелеш эшләренә югары квалификацияле җитди әзерләнгән кадрлары булган оешмалар гына җәлеп ителәчәк. “Хәзер 2013 елгы Универсиада объектлары төзелешендә катнашачак яшьләрне урта махсус белем бирүче уку йортларында укытырга кирәк, - дип белдерде Марат Хөснуллин. - Әгәр без студентларны ярдәмче эшләргә генә җәлеп итсәк, аларның кереме аз була. Шуңа күрә студентлар отрядындагы яшьләр квалификацияле эштә катнаша ала торган итеп әзерләргә кирәк”. Министр шулай ук куркынычсызлык техникасы мәсьәләсенә дә игътибарны юнәлтте.


2009 елның 8 сентябре