Вакыйгалар хроникасы


Минтимер Шаймиев Луврда һәм Версальда булды

11 июльдә ТР Дәүләт киңәшчесе Минтимер Шәймиев җитәкчелегендәге Татарстан делегациясе Лувр музеенда һәм Версаль сарай-паркы ансамблендә булды. Моннан тыш Франция Мәдәният министрлыгының Мәдәни мирасны саклау департаменты директоры Бруно Фавел белән очрашты.

Татарстан делегациясе Лувр музеенда реставрацияләү остаханәсендә булды һәм остаханә директоры Мария Лавандье ханым белән очрашты.

Лувр реставрацияләү лабораториясе Франциянең 1200 музее өчен сәнгать әйберләрен, картиналар, скульптуралар, мебельләрне реставрацияләү эшләрен башкаручы структура. Ул Ауропада һәм дөньяда иң яхшы реставрация остаханәләренең берсе итеп танылган.

Мария Лавандье татарстанлыларның игътибарын Луврда музей, мәгариф, фән һәм реставрацияләү эшчәнлегенең туры килеп торуына юнәлтте.

Беренче чиратта Минтимер Шәймиев сәнгать әйберләренең килеп чыгышын, композициясен, материал составын, датасын һәм чын нөсхә булуын ачыклау җиһазы белән танышты.

“Биредә мин күргән технологияләр мәдәниятне үстерүгә юнәлдерелгән, - бу иртәге көн турында, мәдәни мирас хакында уйлауны белдерә”, дип билгеләп үтте Минтимер Шәймиев.

Делегация Людовик XIV вакытындагы мебельләрне реставрацияләү методикасы белән дә танышты. Татарстан кунакларына танылган рәссам һәм сынчы Жеромның соңгы эше булган скульптураны реставрациядән соң тәкъдим иттеләр. Шулай ук Минтимер Шәймиевка Леонардо да Винчиның “Святая Анна с Мадонной и младенцем Христом” реставрацияләнгән картинасын күрсәттеләр. Ул Леонардо да Винчиның Франциядә реставрацияләнгән беренче картинасы буларак уникаль булып тора. Жеромның скульптурасы белән Леонардо да Винчи картинасы реставрацияләнгән килеш җәмәгатьчелеккә тәкъдим ителмәгән әле. Аларны реставрациядән соң беренче булып Татарстан делегациясе күрде.

Шул ук көнне Минтимер Шәймиев Франция Мәдәният министрлыгының Мәдәни мирасны саклау департаменты директоры Бруно Фавель белән очрашты. Фавель әфәнде татарстанлыларны Франция Республикасы Хөкүмәте белән мәдәният министры исеменнән сәламләде. “Сезнең Парижка килеп, тарихи һәйкәлләрне реставрацияләү һәм саклау өлкәсендә Франция тәҗрибәсе белән танышырга карар итүегезгә шатбыз. Парижда Казанны яхшы беләләр, чөнки Казан Кремле ЮНЕСКО Бөтендөнья мирасы исемлегенә керә”, - дип билгеләп үтте ул. Аның фикеренә караганда, бу очрашу Франция белән Татарстан арасындагы мәдәни хезмәттәшлекне ныгытуда мөһим адым булырга тиеш.

Татарстан делегациясе Версаль сарай-паркы ансамблендә дә булды. Анда Минтимер Шәймиев Версаль президенты кабинеты директоры Оливье Жоссе һәм Версаль сарай-паркы ансамбленең баш архитекторы Пьер-Андре Лаблод белән очрашты.

ТР Дәүләт киңәшчесе паркны карау вакытында, бу комплекста булу күп яңа идеяләр бирде дип билгеләп үтте. “Әгәр Татарстанда шундый парк булдырырга теләсәк, Лаблод әфәндегә мөрәҗәгать итәчәкбез”, - диде М.Шәймиев. “Минем өчен Татарстан Республикасы белән хезмәтәшлек итү зур горурлык булачак”, - диде Версаль сарай-паркы ансамбленең баш архитекторы.

2012 елның 12 июлендә ТР Дәүләт киңәшчесе Минтимер Шәймиев Париж-Сорбон университетының элеккеге президенты Жорж Молинье белән очрашачак, шулай ук Сорбонда XXVII Бөтендөнья җәйге универсиада утын кабызу тантанасында катнашачак.

ТР Дәүләт киңәшчесен эш сәфәрендә Халыкара һәйкәлләр һәм истәлекле урыннар мәсьәләләре буенча советның генераль директоры киңәшчесе Мөнир Бушнаки, ТР Президентының социаль мәсьәләләр буенча ярдәмчесе, ТР тарих һәм мәдәният һәйкәлләрен торгызу фондының башкаручы директоры Татьяна Ларионова, ТР мәдәният министры Айрат Сибагатуллин, Татарстан Республикасының Франция Республикасындагы тулы вәкаләтле вәкиле Искәндәр Йосыпов һ.б. озатып йөри.


ТР Президенты матбугат хезмәте, 2012 елның 12 июле.