Вакыйгалар хроникасы


Минтимер Шәймиев Валентина Матвиенкога Болгарны һәм Свияжскины торгызу проектын тәкъдим итте

Бүген Татарстан Республикасы Дәүләт Киңәшчесе, Татарстан Республикасы тарихи һәм мәдәни истәлекләрен торгызу Республика фондының Попечительләр советы рәисе Минтимер Шәймиев Россия Федерациясе Федераль җыелышының Федерация Советы рәисе Валентина Матвиенкога “Татарстанның мәдәни мирасы: борынгы Болгар шәһәре һәм Свияжск утрау-шәһәре” проектын тәкъдим итте.

Очрашу Казан Кремлендә узды. Анда шулай ук ТР Дәүләт Советы рәисе Фәрит Мөхәммәтшин, Татарстан Республикасы Президентының социаль мәсьәләләр буенча ярдәмчесе, “Яңарыш” фонды башкарма директоры Татьяна Ларионова һәм башка рәсми затлар да катнашты.

Минтимер Шәймиев Валентина Матвиенкога тарихи истәлекләрнең, Болгарда һәм Свияжск утрау-шәһәрендә төзелгән һәм төзелүче яңа корылмаларның стендын, макетларын күрсәтте, әлеге шәһәрләрдә тарихи истәлекләрне торгызу эшләре барышы белән таныштырды. Татарстанның Дәүләт Киңәшчесе Болгарны һәм Свияжскины торгызу проектына Россия Президенты Владимир Путинның ярдәм итүен билгеләп үтте. Финанслау федераль үзәк һәм республика тарафыннан тигез өлешләрдә алып барыла. Болгар һәм Свияжск, мәдәни истәлекләр буларак, Россия күләмендә әһәмияткә ия. Хәзер әлеге объектларны ЮНЕСКО исемлегенә кертү буенча эш алып барыла. Алар икесе дә Идел буендагы иң матур урыннарга урнашкан. Болгарны һәм Свияжскины торгызуга шулай ук хәйриячеләр ярдәме дә мөмкинлек бирде. “Бу шундый игелекле идея һәм шундый игелекле проект, аңа ярдәм итүдән кем генә баш тартыр икән", - дип билгеләп үтте В. Матвиенко.

“Без рухияткә сүздә түгел, ә эштә ирешәбез. Татарстанда хәйриячелек буенча зур тәҗрибә бар. Аерым әйткәндә, без аз керемле гаиләләрдәге беренче сыйныф балаларын бөтен мәктәп кирәк-яраклары белән тәэмин итәбез. Болгарга һәм Свияжскига килгәндә исә, мин, дөресен генә әйткәндә, мондый уңышны үзем дә көтмәгән идем”, - дип җавап бирде М. Шәймиев.

“Бу әлеге процесс башында нәкъ менә Сез торганга күрә шулай. Кешеләрдә сезгә карата бик зур ышаныч бар. Барлык хәйриячеләр белә: аларның һәрбер тиене эштә булачак, республикада Сезнең абруегыз бик югары”, - диде Минтимер Шәймиевкә Валентина Матвиенко.

Татарстан Дәүләт Киңәшчесе кадерле кунакка Хәйриячеләр китабының өченче томын күрсәтте, анда әлеге проектка булышлык күрсәткән кешеләрнең исемнәре кертелгән. “Кешеләр кайвакыт яңа гына туган бала исеменнән “Яңарыш” фондына акча кертәләр. Бу проект - бөтен Россия җәмгыятенә зур сигнал”, - дип ассызыклады М. Шәймиев.

Валентина Матвиенко, Россия Президенты Владимир Путин үз юлламасында чыгышының зур өлешен рухияткә, патриотлыкка, әхлакый нигезләрне торгызуга багышлавын билгеләп үтте. “Бу очраклы түгел”, - диде ул. Болгар белән Свияжскины берьюлы торгызуның дөрес карар булуын да өстәде.

“Бу сезнең зирәк карарыгыз, әгәр дә нинди дә булса бер объектны торгыза башлаган булсалар, бер яктан яки икенче яктан тәнкыйть булыр иде, ә монда тигезлек сакланган”, - диде В. Матвиенко.

Очрашу ахырында М. Шәймиев һәм В. Матвиенко бер-берсенә истәлекле бүләкләр тапшырдылар. “Сез бик игелекле эшкә алынгансыз, бу бары тик шундый бөек кешенең көченнән генә килә. Үз тирәсенә шундый команданы бары тик көчле шәхес кенә туплый ала. Без Болгарга һәм Свияжскига килергә тырышырбыз һәм сезгә бу эшегездә ярдәм итеп торырбыз” - дип йомгаклап куйды Валентина Матвиенко.

“Без “ихлас күңелдән” дигән девиз астында эшлибез. Мин әлеге эшнең фанаты инде, башкача әйтеп булмый”, - дип җавап бирде Минтимер Шәймиев.


"Татар-информ" мәгълүмат агентлыгы. 13.02.2013