Вакыйгалар хроникасы


Минтимер Шәймиев Александр Гуляевка бюст ачу тантанасында катнашты

Бүген Казанда ТР Урман хуҗалыгы министрлыгында ТАССР урман хуҗалыгы министры Александр Гуляевка бюст ачуга багышланган тантаналы чара булды.

Бу чарада Татарстанның беренче Президенты, ТР Дәүләт Киңәшчесе Минтимер Шәймиев, 1968-1978 нче елларда РФ Урман хуҗалыгы министры урынбасары вазифаларын башкарган, бүгенге көндә Россия урманчылары җәмгыяте президенты булган Анатолий Писаренко, Александр Гуляевтан соң министрлык белән җитәкчелек итүне үз кулына алган, бүгенге көндә ТР урманчы ветераннары берлеге рәисе Әбузәр Гаянов, ТР Эчке эшләр министрлыгы ЮХИДИ идарәсе башлыгы Рифкать Миңнеханов, Саба муниципаль районы башлыгы Рәис Миңнеханов,ТР урман хуҗалыгы министры Наил Мәһдиев катнашты.

“Халыкара урман көнен рәсми төстә кертү, кинәт кемнеңдер башына килгән фикер түгел, ә урман белән җитди шөгыльләнергә кирәклеккә төшенүебез. Сезнең һөнәрегез кешелекле һәм җәмгыятькә файда китерү белән сугарылган. Күп очракта табигатькә саксыз караш хакимлек итүгә, урманнан тотнаксыз файдалануга карамастан, үз эшегезгә тугры каласыз. Һәркем саф һава суларга, агач йорт салырга тели – боларның һәммәсен дә сезнең хезмәтегез тәэмин итә”, - дип, Минтимер Шәймиев Татарстан Президенты Рөстәм Миңнеханов һәм үзе исеменнән рәхмәт сүзләрен ирештерде.

Александр Гуляев турындагы якты хатирәләрен яңартып, Минтимер Шәймиев аның көчле рухлы, бай күңелле шәхес булуын, йөзендә кирәк чакта ягымлылык та, кырыслык та шундук ярылып ятуын билгеләп үтте. Бюст авторы скульптор Рөстәм Габбасовның эшен югары бәяләп, ул: “Александр Гуляевның шәхесен тулысынча бер скульптор да ачып бирә алмас иде, чөнки моның өчен бу шәхес белән якыннан таныш булып, аралашу зарур”, - диде. Минтимер Шәймиев әйтүенчә, Александр Гуляевның нәсел-нәсәбе дә бик куәтле, гайрәтле. “Ул үз фикерен ачык итеп җиткереп, проблемаларны югары дәрәҗәдә хәл итеп килде. Кыскасы, ул бик күренекле җитәкче, аның өстен сыйфатлары бәяләп бетергесез. Ул барыбыз да өчен үрнәк булырлык шәхес”, - дип белдерде Минтимер Шәймиев.

Анатолий Писаренко чыгышында Татарстанда урман хуҗалыгына җитди игътибар яшәвен һәм урманчылар өчен уңайлы шартлар тудырылуын билгеләп узды. “Александр Гуляев та, Әбузәр Гаянов та үз эшенә җаваплы карады һәм Наил Мәһдиев тә алар сукмагы буенча эшчәнлекне намус белән дәвам иттерә”, - диде А. Писаренко. Шуны да билгеләп узарга кирәк: Александр Гуляев чорында алыштыргысыз урманчылар буыны хасил булган: Иван Иванов, Нургали Миңнеханов һәм башкалар.

“ Бронза бюст кызармаслык итеп, үз эшебезне намус белән башкарырбыз”, - дип җөпләде Наил Мәһдиев чыгышларны.

Минтимер Шәймиев һәм Наил Мәһдиев Александр Гуляевка бюст ачтылар һәм чәчәкләр салдылар.


“Татар-информ” МА, 21.03.2013