Вакыйгалар хроникасы


ТР Хөкүмәт Йортында Универсиада чорында Болгарда һәм Зөя утрау-шәһәрчегендә туристлыкны оештыру мәсьәләләре хакында фикер алыштылар

Бүген ТР Хөкүмәт йортында Татарстан Премьер-министры Илдар Халиков җитәкчелегендә узган киңәшмәдә катнашучылар Универсиада чорында Болгарда һәм Зөя утрау-шәһәрчегендә туристларга сыйфатлы хезмәт күрсәтүне оештыру мәсьәләләре буенча фикер алыштылар. Киңәшмәдә Татарстан Республикасы Дәүләт Киңәшчесе, ТР Тарих һәм мәдәният һәйкәлләрен яңадан торгызу Республика фондының Попечительлек советы рәисе Минтимер Шәймиев катнашты.

Илдар Халиков киңәшмәне ачканда, Болгар һәм Зөянең тарихи һәйкәлләрен яңадан торгызу эшләренең мөһим булуын билгеләп үтте. “Күп еллар дәвамында Россиядә андый инициатива булмады. Бу эшне оештырган һәм хәйрия акчасы биргән кешеләрнең зур хезмәте юкка чыкмасын өчен, без барысын да эшләргә тиеш”, - дип ассызыклады ТР Премьер-министры.

ТР Хөкүмәт җитәкчесе сүзләренә караганда, Болгар белән Зөя республиканың гына түгел, ә бөтен Россиянең туристлык үзәкләренә әверелергә тиеш. Һәм туристларны җәлеп итәргә мөмкинлек бирүче иң зур чараларның берсе - Казанда Универсиада уздыру булырга тиеш.

Илдар Халиков билгеләп үткәнчә, Студентлар уеннарына 127 илдән 9000 спортчы, 2000 судья, волонтерларны исәпләмичә, 5000 персонал киләчәк. “Безгә дәүләт вәкилләре, вуз хезмәткәрләре, күпсанлы журналистларның килүе, безнең өчен бик мөһим, - дип белдерде ТР Премьер-министры. – Кешеләр республикадан яхшы хис-кичерешләр алып, яңадан килү теләге белән китәргә тиеш, һәм алардан соң башка кунаклар да килсеннәр иде”.

Болгарга килүче туристлар саны 2011 ел белән чагыштырганда 160 процентка артып, 133510 кеше тәшкил итте, дип хәбәр итте ТР яшьләр эшләре, спорт һәм туристлык министры урынбасары Сергей Иванов. Зөягә утрау-шәһәрчегенә килүчеләр саны 254 процентка артып 43287 кеше тәшкил иткән. Универсиада вакытында туристлар агымы шактый артыр дип көтелә.

“Без күпсанлы туристларны кабул итәргә әзер булырга тиеш”, - дип басым ясады Илдар Халиков.
Киңәшмә барышында анда катнашучылар Универсиада чорында туристларга транспорт хезмәте күрсәтү, Болгар һәм Зөя кунаклары өчен мәдәни программа оештыру мәсьәләләрен хәл итү буенча да фикер алыштылар. Бу турислык объектларының рәсми сайтларын популярлаштырукирәк, дип аерым ассызыклады Илдар Халиков. Хәзерге вакытта сәфәр алдыннан туристларның 95 проценты шәһәрнең истәлекле урыннары белән Интернеттан таныша, дип билгеләп үтте ТР Премьер-министры.

“Болгар белән Зөя утрау-шәһәрчегендә эшлисе эшләр бар әле. Бу һәйкәлләрнең язмышы бары тик бездән тора”, - дип йомгаклады ТР Дәүләт Киңәшчесе Минтимер Шәймиев.


ТР Президенты матбугат хезмәте




Шулай ук кара

Фоторепортажлар