Вакыйгалар хроникасы


Минтимер Шәймиев белән ИКОМОС һәм ЮНЕСКО экспертлары уртак эш юнәлешләре хакында фикер алышты

Бүген Казан Кремлендә Татарстан Республикасы Татарстан Республикасы Дәүләт киңәшчесе, “Яңарыш” Республика фондының Попечительләр Советы рәисе Минтимер Шәймиев Халыкара һәйкәлләрне һәм истәлекле урыннарны саклау советы (ИКОМОС) экспертлары Рудольф Бритта һәм Виллем Виллемс, ЮНЕСКО генераль директорының мәдәният буенча урынбасары Франческо Бандарин һәм ЮНЕСКО генераль директорының махсус киңәшчесе Мунир Бушенаки белән очрашты.

ИКОМОС экспертлары һәм ЮНЕСКО вәкилләре Казанга 30 августта килде һәм ике көн дәвамында Болгар музей-саклаулыгы белән таныштылар. Аларның төп максаты – 2014 елда Бөтендөнья мирас комитетына кабат тәкъдим итү өчен “Болгар тарихи-археологик комплекс” номинациясенең яңа досьесын әзерләү буенча Татарстанга булышу.

Минтимер Шәймиев очрашу башында ИКОМОС экспертларына оперативлык өчен рәхмәт белдерде, һәм уртак эш башланды, кунаклар Болгарны үз күзләре белән күргәч бер-беребезне аңлау җиңелрәк булачак, дип билгеләп үтте.

Экспертлар объектларны саклау методикасын уңай бәяләделәр, объектларны саклау һәм аларны музей буларак күрсәтү өчен саклану корылмаларының төрле вариантларын булдыру буенча республиканың кызыклы эшләрен билгеләп үттеләр.

Болгар буенча уртак эшнең чираттагы этаплары буенча фикер алышуда ТР Президенты ярдәмчесе, “Яңарыш” Республика фондының башкарма директоры Татьяна Ларионова, ТР Дәүләт Киңәшчесе секритариаты җитәкчесе Евгений Гришин, ТР Спас муниципаль районы башлыгы Камил Ногаев, ИКОМОС Россия милли комитеты президенты Игорь Маковецкий, ТР Фәннәр академиясе вице-президенты, Ш.Мәрҗани исемендәге Тарих институты директоры Рафаэль Хәкимов, КФУ ның Көнчыгыш телләр һәм халыкара мөнәсәбәтләр институты директоры Рамил Хәйретдинов, ЮНЕСКО Идел буе бүлеге кафедрасы җитәкчесе Рафаэль Вәлиев һәм башка рәсми затлар катнашты.

Очрашудан соң экспертлар Татарстанда алган хис-кичерешләре белән уртаклаштылар.

“Безне Татарстан Хөкүмәте ЮНЕСКО Бөтендөнья мирасы исемлегенә кертүне дәгъвә иткән объект белән танышу өчен чакырды. Без белгечләр белән Болгарны ЮНЕСКО Бөтендөнья мирасы исемлегенә кертергә ярдәм итәчәк яңа досье әзерләү өчен күп эшләдек”, - диде Бритта Рудольф.

“Бу объектның зур факторларга ия булуын күреп шаккаттык. Шулай ук археологлар башкарган эш күләме бездә яхшы тәэсир калдырды, алар Болгар тарихын ача. Без Болгарда булуыбыз белән бик бәхетле”, - дип белдерде Виллем Виллемс.


ТР Президенты матбугат хезмәте