Вакыйгалар хроникасы


Минтимер Шәймиев борынгы Болгар шәһәрендә билгеләр кую буенча киңәшмә уздырды

Татарстан Республикасы Дәүләт Киңәшчесе, “Яңарыш” фондының Попечительләр советы рәисе Минтимер Шәймиев борынгы Болгар шәһәрендә ЮНЕСКО эмблемасы һәм билгесен кую мәсьәләсе буенча эшлекле киңәшмә уздырды.

Болгар тарих-археология комплексы быелгы елның 23 июнендә ЮНЕСКО ның Бөтендөнья мирас исемлегенә кертелде. Августта Болгарда һәм Казанда ЮНЕСКО вәкилләре катнашында Болгар тарих-археология комплексын кешелекнең мәдәни мирас ядкәре буларак рәсми рәвештә танылуы турында сертификат тапшыру уңаеннан тантаналы чаралар узачак.

Минтимер Шәймиев киңәшмәдә катнашучыларны тагын бер тапкыр бу мөһим вакыйга белән котлады. “Безнең бурычыбыз – ЮНЕСКО Бөтендөнья мирасыныкы булуын раслаучы халыкара билгеләрне дөрес һәм лаеклы итеп урнаштыру”, - диде ул.

ТР Президенты ярдәмчесе, “Яңарыш” республика фондының башкарма директоры Татьяна Ларионова Болгар комплексы территориясендә ЮНЕСКО эмблемасы һәм билгеләре һәм тиешле мәгълүмат белән табличкалар урнаштырылачагы турында хәбәр итте. Урнаштыру урыннары һәм тексты дүрт телдә (рус, татар, инглиз, гарәп) язылган табличкалар Париждагы ЮНЕСКО Бөтендөнья мирас комитеты белән килешенәчәк.

“Татинвестгражданпроект” предприятиесе генераль директоры Гадел Хөснетдинов Болгар комплексы территориясендә билгеләр урнаштырылачак урыннарны фикер алышуга тәкъдим итте. Бу урыннар: Болгар цивилизациясе музее белән берләштерелгән Елга вокзалы бинасы, Көнбатыш һәм Көньяк капкалар.

Киңәшмәдә Спас муниципаль район башлыгы Камил Нугаев, мәдәният министры урынбасары Ирада Әюпова, КФУның Халыкара мөнәсәбәтләр,тарих һәм шәрык институты директоры Рамил Хәйретдинов, Казан Дәүләт мәдәният һәм сәнгать университетының фәнни эшләр буенча проректоры, ЮНЕСКОның Шәһәр төзелеше һәм архитектура һәйкәлләрен саклау буенча кафедрасының Идел буе бүлеге җитәкчесе Рафаэль Вәлиев катнашты.


ТР Президенты матбугат хезмәте