Вакыйгалар хроникасы


Минтимер Шәймиев һәм Анатолий Карпов шахмат буенча Россия чемпионаты суперфиналы уеннарын карадылар

Бүген Татарстан Республикасы Дәүләт Киңәшчесе, Россия шахмат федерациясенең Попечительләр советы әгъзасы Минтимер Шәймиев һәм шахмат буенча уникенче дөнья чемпионы, Россия Федерациясенең Федераль Җыены Дәүләт Думасы депутаты Анатолий Карпов классик шахмат буенча Россия чемпионатының ирләр һәм хатын-кызлар суперфиналлары уеннарын карадылар, беренче тур Казан Кремлендә урнашкан "Хәзинә" милли сәнгать галереясендә башланды.

Минтимер Шәймиев һәм Анатолий Карпов Николай Фешин картиналары экспозиясе куелган күргәзмә залы буйлап үттеләр, анда бүген катнашучылар арасында беренче партия уйналучы шахмат такталары урнашкан. Кунаклар Н.И.Фешин исемендәге Казан сәнгать училищесенең яшь рәссамнарына игътибар иттеләр, алар уен вакытында илнең иң танылган шахматчыларының эскиз портретларын ясыйлар.

Аннан соң Минтимер Шәймиев һәм Анатолий Карпов төрле чорның төрле фотоосталарының шахмат турындагы кара-ак фотосурәтләр күргәзмәсен карадылар. Алга таба алар суперфинал матчларыннан онлайн-трансляция залын карады, анда шахматчылар, комментаторлар, шахмат сөючеләр, журналистлар һәм гади тамашачылар чемпионат уеннарын күзәтәләр.

Экскурсия тәмамланганда, Минтимер Шәймиев "Суперфиналны оештыручыларга, аеруча Россия шахмат федерациясе, Елена һәм Геннадий Тимченко фондына зур рәхмәт. Анатолий Евгеньевич Карпов бәяләгәнчә, уңышлы уен өчен бөтен шартлар да булдырылган. Уңышлар телибез! Кешеләр шахмат уйнаса - бу барысы өчен дә отышлы", - дип белдерде.

Турнир Россия шахмат федерациясе тарафыннан Елена һәм Геннадий Тимченко хәйрия фонды белән бергә, Татарстан Республикасы Хөкүмәте булышлыгы белән "Музейларда шахмат" программасы буенча уздырыла.


ТР Президенты матбугат хезмәте, Нүрсөя Шәйдуллина