Вакыйгалар хроникасы


Минтимер Шәймиев Фикрәт Табиев һәм Гомәр Усмановка мемориаль такта ачу тантанасында катнашты

Бүген Татарстан Республикасы Көне бәйрәме алдыннан Казанда Зур Кызыл урамы, 65 адресы буенча ике күренекле дәүләт эшлеклесе Фикрәт Табиев (1928-2015) һәм Гомәр Усмановка (1932-2015) мемориаль такта ачу тантанасы узды. 

Тантанада Татарстан Республикасы Президенты Рөстәм Миңнеханов, ТР Дәүләт Киңәшчесе Минтимер Шәймиев, ТР Премьер-министры Алексей Песошин, ТР Дәүләт Советы рәисе Фәрит Мөхәммәтшин, дәүләт органнары вәкилләре, мәдәният эшлеклеләре катнашты.

Тантаналы чара алдыннан Россия Федерациясе һәм Татарстан Республикасы гимннары яңгырады.

Рөстәм Миңнеханов чыгышында билгеләгәнчә, Фикрәт Табиев һәм Гомәр Усманов Татарстан һәм Россия үсешенә гаять зур өлеш кертәләр.

"Без бүген республикабыз җитәкчеләре - Фикрәт Әхмәтҗан улы һәм Гомәр Исмәгыйль улы исемнәрен мәңгеләштерәбез. Алар республикабызга конкурентлы булырга мөмкинлекне тәэмин иткән нигезне салучылар.  Безнең уңышлар - аларның казанышы. Без республикабыз һәм илебез үсешенә зур өлеш керткән эшлеклеләр исемнәрен истә тотарга тиеш", - диде ул.

Минтимер Шәймиев, үз чиратында, искәрткәнчә, 2020 елда Татарстан АССР га 100 ел тула. "Бу безнең республикабыз тарихының истәлекле бите. Бу тарихта атаклы сәяси һәм иҗтимагый эшлеклеләр исемнәре бар, - диде ТР Дәүләт Киңәшчесе. - Җиңел заман булмый, һәр заманның үз авырлыклары, әмма Фикрәт Әхмәтҗан улы һәм Гомәр Исмәгыйль улы эшчәнлеге кыйммәтле. Алар шул чордагы сәясәт һәм иҗтимагый вәзгыять шартларында республика ихтыяҗларын яклый алганнар".

Аннары Рөстәм Миңнеханов, Минтимер Шәймиев һәм башка рәсми затлар мемориаль такталарга чәчәк салдылар.

 


ТР Президенты матбугат хезмәте