Татарстан Республикасы Президенты Минтимер Шәймиевнең Аналар көненә багышланган бәйрәм тантанасында чыгышы

Хөрмәтле аналар, кадерле хатын-кызларыбыз!

Менә инде алтынчы ел без Рәсәйдә Аналар көнен билгеләп үтәбез. Мин моны бик олы, бик изге гамәл дип әйтер идем. Шул ук вакытта, минем уйлавымча, бүген аналар көне генә түгел — барыбыз өчен дә рухият көне. Әйтик, 8 нче март хатын-кызлар бәйрәме булса, бүгенге бәйрәм — һәммәбезгә кагылышлы изге көн, чөнки аналарга карата игелекле мөнәсәбәтебез, мәрхәмәтебез рухи дөньябызның иминлеген, күңелебез халәтен күрсәтеп тора. Ул нинди дә булса матди җитешсезлеккә яисә муллыкка, гомумән, бернәрсәгә дә бәйле түгел. Әниеңә карата мөгамәләң нинди булса, асылың да шундый, рухи дөньяң да, тәрбияң дә шундый дигән сүз. Анага карашың — ул инде синең кем икәнлегеңне билгеләүче төп күрсәткеч. Шуңа күрә, мин бигрәк тә хәзерге яшь буын өчен әйтәм: әниләрегез исән –сау чакта, яныгызда чакта аларны соңыннан үкенечкә калмаслык итеп хөрмәт итәргә кирәк. Яңадан үкенеп бетеп булмый ул... Ана кеше ул бервакытта да: балам, син минем өчен шуны эшлә дип әйтми, әйтмәячәк тә һәм әйтмәделәр дә алар — безнең әниләр. Әгәр без шуны истә тотып, аналарыбызны онытмыйча, алар өчен һәрвакыт кулдан килгәннең барысын да эшләсәк, шушы мисалда, киләчәк буыннар да намуслы, тәртипле кешеләр булып үсәчәк, бөтен җәмгыятебез дә әхлаклы булачак.

Мин бүген үз исемемнән, хөкүмәтебез һәм Дәүләт Советы исеменнән, менә минем янда сәхнәдә басып торучы күп балалы аналарыбыз һәм сезнең барыгыз исеменнән республикабызның бөтен аналарын, бөтен халкыбызны Аналар көне белән чын күңелдән тәбрик итәм. Бу көнне һәрберебез үз әнисен искә төшереп, үз-үзенә бәя бирергә тиеш. Без аналарыбыз хакына нәрсәләр эшли алабыз, нәрсәләрне булдыра алмыйбыз — шуларга нәтиҗә ясап, күңелебезне чистартып, киләчәк тормышыбызны корырга тиеш дип саныйм.

Сүземне дәвам иттереп, бүген шуны да әйтәсем килә: үз вакытында әниләргә тиешле кадер-хөрмәт күрсәтә алмау үкенече күпләрнең күңелендә яши ул. Шушындый бәйрәм көннәрендә, без, аналары инде исән булмаган кешеләр, эшли алмаган эшләребез өчен алар алдында гафу үтеник. Алар рухына барып җитәр ул, барып җитмәсә, үз күңелләребез бераз тынычланыр. Дөресен генә әйткәндә, бу безнең күбрәк үзебез өчен кирәк. Ә инде аналары исәннәргә, аларга игътибарлы булыгыз дип әйтер идем. Аналарга балалары тарафыннан игътибардан башка берни дә кирәкми. Үз әнисенең никадәр газиз, никадәр якын икәнен һәркем үзе генә аңлый, үзе генә тоя... Һәм яши-яши шундый фикергә киләмен: Аллаһы Тәгалә бер булган кебек, безнең аналарыбыз да бердәнбер. Шуны онытмаска кирәк.

Бәйрәмегез котлы булсын, кадерле аналар! Сезгә саулык-сәламәтлек, бәхет, шатлык, сабырлык телим. Балаларыгызның рәхәтен күреп, алар белән горурланып яшәргә язсын. Барысы өчен дә бик зур рәхмәт сезгә!