Җигелгәнсең икән, тартып булмый, димә

Татарстан Президенты Минтимер Шәймиев, хәзер социаль реформалар өчен җаваплылык Дәүләт Думасында күпчелекне алган "Бердәм Россия" вәкилләренә төшәргә тиеш, дип исәпли.

"Безнең тарихыбызда һәм Дәүләт Думасында беренче тапкыр буларак, конституцион күпчелек формалашты, һәм бердәмроссиялеләр йөзендәге бу күпчелек үзенә социаль реформаларның барышы өчен тулы җаваплылык алырга һәм үзенең нәрсәгә сәләтле булуын күрсәтергә тиеш", - дип белдерде М.Шәймиев Интерфакска биргән интервьюсында.

Шул ук вакытта ул, инде илдә реаль икътисадый үсеш күзәтелгән һәм билгеле бер тотрыклылыкка ирешелгән шартларда үзеңнең сәяси яктан нәрсәгә сәләтле булуыңны раслау беренче карашка гына җиңел тоела, дип искәртте.

"Әгәр "Бердәм Россия" ахыр килеп үзенә төшкән җаваплылыкны күтәрә алмаса һәм үзенең сайлау алды вәгъдәләрен үтәмәсә, оппонентларының гына түгел, бөтен җәмгыятьнең тәнкыйть утында калачак",- дигән ныклы фикердә тора М.Шәймиев.

"Килеп туган вәзгыятьтә КПРФ, ЛДПР, "Родина" блогы вәкилләре һәм Дәүләт Думасында 5 процентлы чикне уза алмаган партияләр вәкилләре бөтенроссиялеләрнең барлык гамәлләрен дә бик игътибарлы рәвештә күзәтеп барачак", - диде М.Шәймиев.

Республика җитәкчесе шулай ук, фәкать партияләр арасыннан берсенең генә ышанычлы җиңүе аша илдә күп партиялелекнең реаль системасы пәйда булырга мөмкин, дигән ышануын белдерде. Моңа бәйле рәвештә М.Шәймиев 7 декабрьдә булган сайлауларны, Россия тормышында һәм гражданлык җәмгыятен торгызу процессында хәлиткеч вакыйга, дип бәяләде.

М.Шәймиев Дәүләт Думасында "Бердәм Россия" вәкилләренең барлык төп Вазыйфаларны алуын гаепләми. "Килеп туган бу хәл - парламент күпчелегенең нормаль практикасы. Биредә бары тик "Җигелгәнсең икән, тартып булмый, димә" дигән мәкальне генә искә төшерергә була", - дип билгеләп үтте Татарстан Проезиденты.