Минтимер Шәймиев: "Фрадков реформалаштыруны тизләтергә мөмкинлек бирәчәк"

РФ премьер-министры итеп Михаил Фрадковны куелуны Минтимер Шәймиев, реформаларны уздыруны тизләтергә мөмкинлек бирәчәк фактор дип саный. Бу турыда "Интерфакс" хәбәр итә.

"Ул (Фрадков) тышкы икътисадый тәэсир системасын яхшы белүче, салым даирәсен аңлаучы тәҗрибәле профессионал", - дип белдерде РТ Президенты.

"Моннан чыгып, Татарстан җитәкчесе бүгенге Россия шартларында, хөкүмәт җитәкчесе булып дөньяны да, алга киткән илләрдәге базар икътисады эше механизмын да яхшы белүче кеше булуы мөһимлеген махсус искәртте", - дип хәбәр итә "Интерфакс". "Эффектлы эшләүче хөкүмәт һәм икътисадны либералләштерүнең дәвам итүе турында сүз барганда, мондый торыш аеруча мөһим", - дип ассызыклаган Минтимер Шәймиев.

ТР Президенты Фрадковка хөкүмәтнең тагын да уңайлырак вариантын төзү җиңелрәк булыр, дип саный. Хөкүмәт алдында дөньякүләм базарда көндәшлеккә лаек икътисадны төзү иң мөһим маскатларның берсе булып торганда, яңа премьерның тәҗрибәсе һәм белеме кулланылыш табыр дип ышаныч белдерелә.

Минтимер Шәймиев, элек тә Михаил Фрадков белән хезмәттәшлек итүен искәрткән. Ул вакытта Фрадков СССРның тышкы икътисад элемтәләре белән шөгыльләнгән булган. Татарстан чит илләрдән нефть һәм нефтехимия өлкәсе өчен кирәк булган күп җиһазларны сатып алды һәм ала. "Илнең автогиганты КамАЗ да чит ил җиһазларында төзелде. Һәм бу мәсьәләләрне тышкы икътисад мөнәсәбәтләре министрлыгы аша, һәм еш кына Михаил Фрадков аша чишә идек", - дип белдерде Минтимер Шәймиев.

Президент республиканың чит ил партнерлары белән күп контрактлар төзүен искәртә. Әмма төрле бюрократик үзара килешеп эшләнүне таләп итүче киртәләрне узуның, аннан битәр илнең икътисадый иминлеген дә тәэмин итүне никадәр катлаулы икәнен беләләр.

"Шулай да без Михаил Ефимович белән һәрвакытта конкрет чишелешләр таба идек, һәм алар югары профессиональ дәрәҗәдә эшләнә иде. Иң беренче чиратта ул шуның белән исемә кереп калды да инде", - ди Минтимер Шәймиев.

Шулай ук ТР Президенты күп кенә федераль чиновникларның элеккеге стериотиплар тәэсирендә булуларын искәртә. Чиновниклар элемтәләрне алга җибәрү белән шөгыльләнәсе урынга, барыннан битәр "кертмәскә" принцибын куллана.

"Ирекле үсештән, илдәге товар җитештерүче өчен тиешле шартларны булдырудан тыш, артык чикләүләрне юкка чыгармыйча ил икътисадында реаль базар үзгәрешләрен кертү турында сөйләү мөмкин түгел", - дип саный Минтимер Шәймиев. Президент Фрадковның Евросоюздагы РФ вәкиле булып эшләү тәҗрибәсенең дә киләчәктә икътисадны базар шартларына яраклаштыру өчен файдалы булыр дип уйлый.