Татарстан Республикасы Президенты Минтимер Шәймиевнең Яңа ел мөрәҗәгате

Хөрмәтле ватандашлар!

Яңа ел киче чын мәгънәсендә гаилә бәйрәме ул. Бу мизгелдә без дусларыбыз, туганнарыбыз белән бергә җыелышып күңел ачабыз, фикерләшәбез, киңәш тотабыз.

Узып баручы елда илебез, республикабыз өчен хәлиткеч вакыйгалар дип Россия Президентын һәм Татарстан Республикасы Дәүләт Советына депутатлар сайлауны атар идем.

Тормышта кайгы белән шатлык янәшә йөри. Дөньяны тетрәткән Беслан фаҗигасе һәм террорчыларның башка җинаятьләре Татарстан халкында чиксез нәфрәт уятты. Барыбыз да шуны аңладык: мондый очракларда иң мөһиме – бер-береңә терәк булу, ярдәм итү, бу хәлләрдән гыйбрәт алып, аларны булдырмау чараларын күрү.

Киләсе елда шәһәр һәм авылларда җирле үзидарә органнары оештырылачак. Бу - хакимиятне халыкка якынайтучы бик мөһим адым булачак.

2005 нче елда Бөек Ватан сугышында Җиңүнең 60 еллыгын билгеләп үтәчәкбез. Утлы елларны кичкән сугыш һәм тыл ветераннарына һәръяклап ярдәм итү, тиешле кадер-хөрмәт күрсәтү - һәрберебезнең изге бурычы. Алар безнең өчен тугрылык, намус һәм батырлык үрнәге булып торалар.

Республиканың җитештерү өлкәсе көннән-көн ныгый бара. Нефть, нефть химиясе, төзелеш, машина төзү, энергетика тармаклары Татарстанның тотрыклы үсешен тәэмин итә, киләчәккә нигез сала. Авыл хезмәтчәннәре дә сынатмыйлар, узган елгы мул уңыш - моның ачык дәлиле. Җитештерү өлкәсенә инвестицияләр кертү арта бара һәм моның уңай нәтиҗәләрен тиз арада күрербез дип ышанам. Шунысы мөһим: Татарстанда промышленность үсеше дөнья базарындагы нефть бәяләренә генә бәйләнмәгән, бу - республика икътисадының тотрыклы эшләве, йөз меңләгән хезмәтчәннәрнең тырышлыгы, фидакарьлеге нәтиҗәсе. Туган җиребезне үстерүгә куйган намуслы хезмәтегез өчен сезгә ихлас күңелемнән зур рәхмәт.

Соңгы елларда Яңа ел бәйрәмендә өй туйлары үткәрү матур гадәткә әйләнде. Гомумән әйткәндә, без вәгъдәбезне үтәдек. Тузган торакны бетерү программасы буенча 50 меңгә якын гаилә яңа, уңайлы фатирларга урнашты. Тузган торак фондына даими рәвештә түләү кертеп, әлеге олы эштә ярдәм күрсәткән хезмәт коллективларына, эшкуарларга, бу программаны оештыручыларга, данлыклы төзүчеләребезгә аеруча зур рәхмәт! Тупланган тәҗрибә нигезендә, туасы елның 1 гыйнварыннан без бу тиңдәше булмаган эшне социаль ипотека программасы рәвешендә дәвам итәчәкбез. Анда бигрәк тә бюджет өлкәсендә эшләүчеләргә һәм яшь гаиләләргә сизелерлек ташламалар каралган.

Әлбәттә, безнең тормыш гел уңышлардан гына тормый. Илдә башланган социаль реформаларның каршылыклы баруын халык һаман үз җилкәсендә татып бара. Ташламаларны акчага алмаштыру һәм торак-коммуналь хуҗалык реформасы халыкны аеруча нык борчый. Бюджет акчасы чикле булуга карамастан, республика җитәкчелеге бу чорда кешеләрнең хәлен җиңеләйтү өчен бар тырышлыгын куячак.

Киләсе яңа ел безнең өчен аеруча истәлекле булачак. Без башкалабыз Казанның меңьеллыгын бәйрәм итәчәкбез. Бу тарихи вакыйга Татарстанны Россиядә генә түгел, дөньякүләм дәрәҗәдә танытуда зур әһәмияткә ия. Шигем юк: бу зур юбилей безнең күп милләтле халкыбызны тагын да ныграк берләштерер һәм үзара аңлашуга зур этәргеч булыр.

Кадерле дуслар!

Яңа ел яңа эшләргә, яңа уңышларга, яңа дуслар табуга, гомумән яңарышка өнди. Сезгә болар барысы да насыйп булсын. Барыгызга да саулык-сәламәтлек, бәхет, тынычлык һәм иминлек телим! Яңа елга тагын бер киңәш: әтәч елы дип бик әтәчләнеп китмәскә иде.

Яңа еллар котлы булсын, газиз милләттәшләр!