М.Шәймиев: "Ташламалар законын тормышка ашыру кичектерелмәячәк"

Татарстан Президенты Минтимер Шәймиев ташламаларны акчалата түләү турындагы законны тормышка ашыруны кичектерү мөмкин эш түгел, диде "Интерфакс" мәгълүмат агентлыгына биргән интервьюсында. "Моңа өндәгән кешеләр базар икътисады шартларында натуралата өстенлекләрне саклау файдасыз булуын аңларга тиеш. Гомумән, бу ике төшенчә үзара килешә алмый", - диде Минтимер Шәймиев.

Президент ассызыклаганча, ташламаларны акчалата түләү законын кичектерү барлык транспорт һәм илнең башка структураларын киеренкә хәлдә калдырычак, шулай ук халыкка хезмәт күрсәтү сыйфатына да йогынты ясыячак. Президент фикеренчә, килеп туган низаглы вәзгыять әлеге законны тормышка ашыруның механизмы баштан ук уйланып бетмәгәнлеккә бәйле. "Тоткарлыклар өчен төбәкләрне гаепләү - гаделсезлек. Россия хөкүмәте һәм президенты белән сөйләшкәннән соң моны аңладылар кебек. Һәр төбәкнең тәэмин ителеше төрлечә, теге яки бу ташламаларны билгеләгәндә шуңа игътибар итәргә кирәк", - дип саный Президент.

"Бердәм транспорт билетларын кертү турында федераль хөкүмәткә, "Бердәм Россия" партиясе президиумына, Дәүләт Думасы комиссияләренә закон проекты әзерләнгәндә үк күп тапкырлар әйткән идек. Ниһаять, быел 17 гыйнварда РФ хөкүмәтендә үткән киңәшмәдә күп кенә мәсьәләләр буенча уртак фикергә килә алдык", - ди М.Шәймиев.

Бүген Татарстан Президенты ташламалар тирәсендәге вәзгыять һәрьяклап тикшерелде, мәсьәләләрне чишү юллары табылды, дип белдерде. "Район һәм шәһәр хакимияте вәкилләре белән киңәшләшкәннән соң ташламалар белән файдаланучыларга ай саен 200 сумлык юл-транспорт билетлары булдырылачакк. Ул республика карамагындагы, шулай ук федераль льготачаларга да биреләчәк", - дип хәбәр итте Президент.

М.Шәймиев шулай ук "Интерфакс" агентлыгына мәктәп укучылары өчен 120 сумлык һәм студентлар өчен 150 сумлык билетлар калдырылылачагын да әйтте.