Минтимер Шәймиев: “Моабит циклы үзенең ышанычлы, тормышчан булуы белән җәлеп итә”

“Литературная газета” басмасының соңгы санындагы “Литературный Татарстан” кушымтасында ТР Президенты Минтимер Шәймиевнең герой-шагыйрь Муса Җәлилнең тууына 100 ел тулуга багышланган “Батырлык шагыйре” (“Поэт мужества”) дигән мәкаләсе дөнья күрде.

Минтимер Шәймиев багышлама-мәкаләсендә атаклы татар шагыйренең фаҗигале һәм легендар язмышы турындагы уй-фикерләре белән уртаклаша. “Җәлил татар әдәбияты тарихына батырлык шагыйре буларак кереп калды. Аның исеме уртаклык исеменә әверелеп, чыдамлык, каһарманлык һәм Туган илгә тугрылык билгесе булды”, - дип билгеләп үтә республика башлыгы газета битләрендә “Җәлил – күпмилләтле әдәбиятыбызның берьюлы ике югары исемгә – Советлар Союзы Герое (Бөек Ватан сугышында күрсәткән шәхси батырлыгы һәм искиткеч чыдамлыгы өчен) һәм Ленин премиясе лауреаты (“Моабит дәфтәрләре” шигырьләр циклы өчен) – лаек булган бердәнбер вәкиле. Ике исем дә үлгәннән соң бирелгән, - диелә мәкаләдә. – Бу факт шагыйрьнең тормыш һәм иҗат батырлыгы бердәмлеген чагылдыра. Аның тормышы – югары шигърият белән үрелеп барган Ватанга эчкерсез хезмәт итү, чын каһарманлык үрнәге. Ә шигърияте – беренче чиратта – Моабит циклы – ышанычлы, тормышчан булуы белән җәлеп итә. Биредә һәрбер юлы өчен үз тормышы һәм каны белән иң югары бәя түләнгән”.