2006 елгы Сабантуй бәйрәме уңаеннанТатарстан Республикасы Президенты М.Ш.ШәймиевКОТЛАВЫ

Хөрмәтле татарстанлылар!

Республика Дәүләт Советы, Хөкүмәтебез исеменнән һәм шәхсән үзем барыбызны да ихлас күңелдән милли Сабантуй бәйрәме белән тәбрик итәм.

Бу борынгы һәм мәңге яшь бәйрәм халкыбыз тормышында зарыгып көтеп ала торган зур вакыйга. Ул Җир-ананың уянуын гәүдәләндерә, игенче хезмәтен данлый, татар халкының үзенчәлекле бай мәдәниятен, кунакчыллыгын һәм башка асыл сыйфатларын күрсәтә.

Бәйрәмдә хөкем сөргән хөрлек, рухи күтәренкелек аның мәйданын елдан-ел киңәйтә бара. Игенче хезмәте белән тыгыз бәйләнгән бу нурлы бәйрәм барлык шәһәрләргә һәм калаларга да килде, бик күп төбәкләрдә һәм илләрдә яшәүче төрле милләт кешеләренең мәдәни тормышының аерылгысыз сәхифәсенә әверелде.

Халыкның бай иҗаты белән сугарылган Сабантуй яшәү дәртен, җитезлек һәм чаялыкны, осталыкны һәм уен-көлкене бергә туплаган җанга ямь бирә торган бәйрәм. Борынгыдан калган атларда чабышу, милли көрәш, төрле йолалар һәм үзенчәлекле уеннарны үз эченә алып, ул милли гореф-гадәтләрне саклауда һәм үстерүдә, шулар аша халкыбызны берләштерүгә, кардәшлек элемтәләрен ныгытуга хезмәт итә.

Уртак мирасыбызның бай тарихын, әхлакый кыйммәтләребезнең асылын тирәнтен өйрәнүгә зур этәргеч биргән Әдәбият һәм сәнгать елында Сабантуй үзенең кабатланмас төсмерләрен бөтен гүзәллеге белән ачар, республикабыз тормышында истә калырлык зур вакыйга булыр, дип ышанам.

Халкыбызда йөзек кашы булган бу ямьле бәйрәм барыбызга да яңа көч-куәт һәм киләчәк көннәргә ышаныч өстәсен, сөекле Татарстаныбызның чәчәк атуы хакына изге эш-гамәлләргә рухландырсын!

Сезгә һәм Сезнең якыннарыгызга чын күңелдән исәнлек-саулык, бәхет һәм иминлек телим!