Бөек Ватан сугышында Җиңүнең 63 еллыгы уңаеннан Татарстан Республикасы Президенты М.Ш. Шәймиев мөрәҗәгате

Сезне Бөек Ватан сугышында Җиңүнең 63 еллыгы белән чын күңелдән тәбрик итәм!

1945 елның Җиңү китергән сөенечле ул көненнән соң күпме генә еллар үтмәсен, фашизм һәлакәтеннән бөтен дөньяны коткарып калган җиңүчеләр буыны, аның тиңдәшсез батырлыгы күпмилләтле халкыбыз хәтерендә мәңге сакланачак. Безнең солдатлар үз-үзләрен аямыйча, үз гомерләрен корбан итеп дөньядагы иң коточкыч афәтне туктаттылар, кеше үтерүгә корылган фашист режимын тар-мар иттеләр.

Рәхимсез сугыш озын-озак дүрт ел буе туган җиребезне телгәләде, туганнарыбызны, якыннарыбызны тартып алды, күпме кешене туган туфракларыннан йолкып, чит җирләргә, үлем кочагына илтеп ташлады, күпмесен яралады, имгәтте. Сугышның төзәлмәс яралары әле дә сызлый, күпме авыл һәм шәһәрләребез, урман-кырларыбыз сугыш эзләрен әле дә саклый. Куеннарына исемсез батырларның гәүдәләрен сыендырган күпсанлы туганнар каберлекләре шул дәһшәтле елларны хәтерләтеп йөрәкләрне сыкрата. Бөек Җиңүнең бәһасе әйтеп бетергесез югары булды. Безнең моны онытырга хакыбыз юк. Дистәләрчә миллион ватандашларыбыз канкойгыч сугыш кырларында мәңгегә башын салды, концлагерь мичләрендә янып көлгә әйләнде, чолганыштагы Ленинградта ачлыктан кырылды, фашист бомбалары астында калды; госпитальләрдә - авыр яралардан, нацистлар коллыгында - ерткычларча җәзалаулардан, тылда исә хәлдән килмәслек авыр хезмәттән вафат булды.

Күпмилләтле Татарстан гына да фронтка 700 меңнән артык улын һәм кызын озатты, аларның яртысы диярлек туган җиренә әйләнеп кайтмады... Бу сугыш аналар йөрәгенә гомерлек кайгы-хәсрәт салды.

Бүген төрле милләт һәм төрле дин кешеләре сугыш корбаннарының һәрберсен исеме белән телгә ала, һәркем үз телендә алар рухына дога кыла. Шушы бердәм искә алу догасы җаннарыбызны сафландыра, берләштерә. Без сугыш кырларындагы тиңдәшсез батырлыклары һәм тылдагы тырыш хезмәтләре белән Бөек Җиңү көнен якынайткан ватандашларыбызны һичкайчан онытмаска, һәлак булганнарны данга күмәргә, исәннәр турында һәрчак кайгыртырга сүз бирәбез.

Сугыштан соңгы гаять авыр елларда шул чор кешеләренең фидакарьлеге нәтиҗәсендә илебез, хәрабәләрдән күтәрелеп, аякка басты, дөнья үсешен билгеләүче бөек дәүләткә әверелде. Бүген безнең илебез, үз тарихында гаять четерекле сынауларны үтеп, яңадан көч-кодрәт туплый, заман таләпләренә тиешле һәм лаеклы җавап бирә алучы абруйлы ил дәрәҗәсенә ирешеп бара. Хәзерге катлаулы чорда да без җиңүчеләр буынын үзебезгә үрнәк итеп куябыз.

Бөек Ватан сугышында батырларча һәлак булганнарның якты истәлеген саклау һәм бүгенге көндә исән ветераннарга һәръяклап игътибар һәм ихтирам күрсәтү - безнең әхлакый бурычыбыз. Ветераннарга һәрдаим ярдәм, алар иминлеге өчен кылынган игелекле гамәлләр җәмгыятебезне берләштерә, ныгыта, яңа, зур эшләргә канатландыра, безне игелеклерәк булырга өйрәтә. Шунысы аяныч: сугыш ветераннарының саны көннән-көн кими бара. Шуңа күрә кадерле ветераннарыбызны лаеклы тормышта яшәтү, буыннар бәйләнешен ныгыту өчен бар тырышлыгыбызны куярга, соңга калмаска кирәк.

Безнең хөрмәтле ветераннарыбыз һәр яктан мактауга лаек: алар әле бүген дә күтәренке рухлы, зур тормыш тәҗрибәсе туплаган көчле шәхесләр. Сугыш газапларын кыю кичереп, газиз халкына тугры калган ветераннарыбызга чиксез рәхмәтлебез. Ватаныбызны һәм халкыбызны яратырга алардан өйрәнергә кирәк. Без әхлакый яктан сәламәт яшь буынны - сугыш каһарманнарының лаеклы дәвамчыларын бары тик өлкәннәрнең шушы батырлыгы үрнәгендә генә тәрбияли алачакбыз. Шунысы куанычлы: соңгы вакытта республикабызда хәрби-патриотик эшне киң җәелдерү, кадет сыйныфларын арттыру кебек гамәлләр ишәйде, алар балаларда гражданлык хисе һәм ил язмышы өчен җаваплылык тәрбияләүгә хезмәт итәләр.

Бөек Ватан сугышы фашизмга каршы нәфрәтне безнең каныбызга сеңдерде. Шуңа күрә без кайбер илләрдә Җиңү мемориалларының, сугыш геройлары һәйкәлләренең җимерелүенә, фашист калдыкларына Бөек Ватан сугышы каһарманнары белән бертигез хокуклар бирелүенә битараф карый алмыйбыз. Үзен цивилизацияле дип санаган дөньяда мондый күренешләргә урын булмаска тиеш! Чөнки әлеге мәсхәрәле адымнар миллионлаган кешенең кан коюы бәрабәренә ирешелгән Бөек Җиңүнең азатлык миссиясен шик астына куюга китерә, җәмгыятьнең рухи нигезен какшата. Без фашизмның кире кайтуына юл куя алмыйбыз. Яңадан сугыш янгыны кабызырга омтылучыларга катгый каршылык күрсәтү - һәрберебезнең изге бурычы.

Бөек Җиңү бәйрәме көнендә телләребездән төшми торган бердәм теләгебез шул: илебезнең һәм бөтен Җир шарының күге аяз булсын, балаларыбыз һәм оныкларыбыз сугыш дәһшәте күрмәсен! Бөек Җиңүнең өлкән буыннар безгә мирас итеп калдырган изге әләме, безгә көч биреп, күп гасырлар буе җилфердәсен!

Хөрмәтле ватандашлар! Сезнең барыгызга тынычлык, сәламәтлек, иминлек һәм бәхет телим. Бөек Җиңү бәйрәме котлы булсын!