Минтимер Шәймиев: "Милләтләр арасында шундый аңлашу булганда күңел сөенә»
Бүген Казан Кремленең Вәкиллек корпусында Милләтара һәм конфессияара мөнәсәбәтләр буенча Татарстан Республикасы Рәисе каршындагы совет утырышы узды.
Утырышта Татарстан Республикасы Рәисе Рөстәм Миңнеханов, Татарстан Республикасы Дәүләт Киңәшчесе, Россия Федерациясе Хезмәт Герое Минтимер Шәймиев, Татарстан Республикасы Дәүләт Советы Рәисе Фәрит Мөхәммәтшин, Татарстан Премьер-министры Алексей Песошин, Россия Федерациясе Дәүләт Думасының Милләтләр эшләре комитеты рәисенең беренче урынбасары Илдар Гыйльметдинов, Россия Фәннәр академиясенең Этнология һәм антропология институты фәнни җитәкчесе, академик Валерий Тишков, Россия Федерациясе Президентының Эчке сәясәт идарәсенең милли сәясәт департаменты башлыгы Татьяна Вагина (видеоконференцэлемтә режимында) катнашты.
Татарстан Республикасы Рәисе Рөстәм Миңнеханов искәрткәнчә, Татарстанда 2025 елга кадәр чорга Россия Федерациясенең Дәүләт милли сәясәте стратегиясен гамәлгә ашыруның республика планын үтәү кысаларында зур эш башкарылган.
"Ил Президенты В.В. Путин тарафыннан 25 ноябрьдә 2036 елга кадәр чорга яңа Стратегия расланды. Документта рус халкының күп милләтле бердәмлекне саклаудагы роленә, Россия Федерациясенең этномәдәни һәм тел төрлелегенә, мәдәниятара һәм динара хезмәттәшлекнең тарихи тәҗрибәсенә һәм традицияләренә аерым игътибар бирелә. Алар илнең дәүләт тарафыннан саклана торган күп милләтле халкы байлыгы дип аталды», - диде Татарстан Рәисе.
"Татарстан - ачык къренеп торган күп милләтле һәм күп конфессиональ составлы республика. Гасырлар буена монда Идел буе халыклары вәкилләре – татарлар, руслар, чуашлар, удмуртлар, марыйлар, мордвалар һәм башка халыклар тупланып һәм тату яшиләр.
Шул ук вакытта соңгы елларда милли составка миграция процесслары сизелерлек йогынты ясый башлады. Узган еллардагы утырышларда без моңа бәйле мәсьәләләрне аерым карадык. Кабул ителгән карарларны гамәлгә ашыру буенча системалы эш алып барыла», - дип белдерде Рөстәм Миңнеханов.
Ул билгеләп үткәнчә, милләтара һәм конфессияара тынычлыкны һәм татулыкны саклау – республиканың уңышлы үсешендә мөһим шарт. "Ведомствоара нәтиҗәле хезмәттәшлекне тәэмин итеп, этномәдәни үсеш мәсьәләләрен комплекслы һәм системалы хәл итү бик мөһим: барлык дәрәҗәдәге хакимият органнары, граждан җәмгыяте институтлары, милли-мәдәни һәм дини оешмалар, эксперт һәм фәнни җәмәгатьчелек", - диде Татарстан Рәисе.
ТР Дәүләт Киңәшчесе Минтимер Шәймиев үзенең кыска чыгышында билгеләп үткәнчә, республикабыз гына түгел, гомумән Россия Федерациясе үткән милләтара мөнәсәбәтләрне үстерү юлы билгеле бер канәгатьлек хисе уята.
"Милләтара мөнәсәбәтләр проблемалары гади булмый, һәм без аларны хәл итә алабыз. Без кискен моментларны уңышлы җиңеп чыга алабыз. Бу зур казаныш. Әгәр дә без шулай ук сабырлык белән, халык сүзләренә колак салып, алга таба да яшәсәк һәм эшләсәк, барысы да әйбәт булачак», – диде ул.
"Без хәзер республиканың уңышка дучар булуына ышана алабыз, чөнки без эшли беләбез, мөмкинлекләребез, ресурсларыбыз, халкыбыз, күп милләтле халкыбыз бар. Шуңа күрә, катлаулы үзгәртеп кору елларын узып һәм билгеле бер тәҗрибәгә ия булып, хәзер без аны ныгытырга һәм уңышны тәэмин итәргә тиешбез. Иң мөһиме, барлык милләтләр арасында үзара аңлашу бар. Бүген без тыныч, конструктив сөйләштек, очрашу бик эчтәлекле булды. Барлык проблемаларны сабыр гына акыллы хәл итү юлларын табабыз. Шулай дәвам итәргә кирәк. Мондый аңлашу булганда күңел сөенә. Сабыр булырга, бер-береңне һәм республиканы яратырга кирәк", - дип нәтиҗә ясады Минтимер Шәймиев.
Утырыш барышында ТР мәдәният министры Ирада Әюпова, ТР мәгариф һәм фән министры Илсур Һадиуллин, Балтач муниципаль районы башлыгы Рамил Нотфуллин, Татарстан Республикасы Мордва милли-мәдәни автономиясе рәисе Наталья Сабитова һәм башкалар чыгыш ясады.