ЯҢАЛЫКЛАР

31 мартта М.Җәлил исемендәге Татар дәүләт опера һәм балет академия театрында күренекле җырчы, Россия һәм Татарстанның халык артисты, Г.Тукай исемендәге ТР Дәүләт премиясе лауреаты Венера Ганиеваның юбилей кичәсе узды.

31 мартта Казан Кремлендә Татарстан Республикасы Президенты Россиянең һәм Татарстанның халык артисткасы Венера Ганиева белән очрашты. Рөстәм Миңнеханов җырчыга «Татарстан Республикасы каршындагы казанышлары өчен» орденын тапшырды.

Татарстан Республикасы югары башкарма комитетының структурасы үзгәрми. ТР Президенты матбугат хезмәте җитәкчесе Андрей Кузьмин гаммәви мәгълүмат чараларында дөнья күргән ТР Хөкүмәтендә кадрларны алыштыру ихтималы турындагы белдерүләргә җавап итеп шулай дип рәсми рәвештә белдерде.

"Бүгенге көндә, закон нигезендә, ТР Хөкүмәте үз вәкаләтләрен туктатты, әмма ТР Президенты Указы нигезендә үз вазифаларын үтәүне дәвам итә. Үземә йөкләнгән вәкаләтләр нигезендә Татарстан Республикасы хакимияте структурасында үзгәрешләр булмаячагын белдерәм", - дип белдерде "Татар-информ" мәгүлүмат агентлыгы хәбәрчесенә Андрей Кузьмин.

Казанда 500 гә якын кеше Мәскәү метросында булган теракт корбаннарын искә алды. Бүген иртән 7.57 сәгатьтә (Мәскәү метросындагы беренче шартлау шул вакытта яңгырый) Бауман урамында Шаляпин һәйкәле янында матәм митингы башланды. "Мәдәният паркы" һәм "Лубянка" метро станцияләрендәге шартлаулар вакытында һәлак булучылар санынча 39 шәм кабызылды. Митингта катнашучылар "Террорчылык - тынычлыкка янау", "Кешеләр - сак булыгыз", "Террорның милләте юк" дигән сүзләр язылган плакатлар тотып басып торды.

"29 март көнне Мәскәүдә коточкыч җинаять кылынды, аның нәтиҗәсендә 39 кешенең гомере өзелде, 70 тән артыгы госпитальләрдә дәвалана. Әлеге вакыйгалар үзенең рәхимсезлеге белән шаккатыра", - дип белдерде митингта "Бердәм Россия" Бөтенроссия сәяси партиясенең Татарстан төбәк бүлеге башкарма комитеты җитәкчесе Виктор Бударин.

Быел Габдулла Тукай исемендәге Дәүләт премиясенә, лаеклылар эшләрен караганнан соң, Татарстан Президенты каршындагы Дәүләт премияләре буенча Комиссия 9 кандидатны тәкъдим итәргә булды.

Алар - 2005 елда чыккан "Мәгарә: шигырьләр, поэмалар" шигырьләр җыентыгы һәм 2008 елда дөнья күргән "Ташка ордым башны: хикәяләр, эсселар" җыентыгы өчен әдип Ркаил Зәйдулла; "Бәхетсезләр бәхете" трилогиясе өчен язучы Фоат Садриев; "100 татар халык җыры" аудиоҗыентыгын чыгарган, татар халкы җырларын популярлаштырган һәм профессиональ башкарган өчен җырчы Мирсәет Сөнгатуллин; "Женский лик Победы" бишенче симфониясе һәм фортепиано белән оркестр өчен "Минем Казаным" 1-нче концерты дигән симфоник әсәрләрен иҗат иткән Шамил Тимербулатов.

Татарстан делегациясе Ульян өлкәсендәге гаилә сөтчелек фермаларында булды. Терлекчелек объектларыннан тыш, делегация әгъзалары авылда панель-каркас йортлар салу принциплары белән танышты. Делегацияне ТР Премьер-министры урынбасары вазифаларын башкаручы - ТР авыл хуҗалыгы һәм азык-төлек министры вазифаларын башкаручы Марат Әхмәтов җитәкләде, дип хәбәр итә ТР Авыл хуҗалыгы һәм азык-төлек министрлыгының матбугат хезмәте.

Визит барышында Татарстан делегациясе төзелеш эшләре алып барыла торган комплексларда булды, өлкәдәге яңа бистәләрнең берсендә панель-каркас йортлар салу принциплары белән танышты. Яңа Малыклы районында гаилә фермалары бюджет акчалары хисабына төзелә һәм авыл эшкуарларына бирелә. Сөтчелек фермасы өчен эшкуар 30 процент күләмендә үз акчасын түли, бина бәясенең 70 проценты банкларның заем акчалары хисабына каплана.

31 мартта Татарстан Республикасы Президенты Р.Н. Миңнеханов Административ хокук бозулар турында Татарстан Республикасы Кодексына, «Вөҗдан иреге һәм дини берләшмәләр турында» һәм «Халык сәнгать һөнәрләре һәм кәсепләре турында» законнарга үзгәрешләр кертү хакындагы законнарга имза салды.

30 мартта ТР Дәүләт Советында республика Иҗтимагый палатасы әгъзалары өчен Ачык ишекләр көне оештырылды. Шулай итеп, Татарстан җәмәгатьчелеге вәкилләрен республика парламенты эшчәнлеге белән таныштыру дәвам итә. Ачык ишекләр көне Дәүләт Советы турындагы күзаллауны киңәйтү, парламент фракцияләре, комитетлары һәм комиссияләре эше белән якыннан таныштыру, закон чыгару процессы нечкәлекләрен күрсәтүдән гыйбарәт. Мондый очрашулар хакимият белән җәмгыять арасында элемтәләрне җайга салуда мөһим адым булып тора.

Ачык ишекләр көнендә катнашучылар белән ТР Дәүләт Советы Рәисе Фәрит Мөхәммәтшин очрашып, аларны кызыксындырган мәсьәләләр буенча фикер алышты. Утырыш башында парламентарийлар һәм палата вәкилләре Мәскәү метросындагы шартлаулар вакытында үлгән кешеләрне бер минут тынлык белән искә алды.

30 мартта Татарстан Республикасы Президенты Рөстәм Миңнеханов "Татарстан Республикасы Дәүләт киңәшчесе турындагы" һәм "Татарстан Республикасы Конституциясенең 75, 76, 94 маддәләренә үзгәрешләр кертү турындагы" законнарга кул куйды. Беренче закон нигезендә Татарстан Республикасы Дәүләт киңәшчесе статусы, вазифага билгеләү тәртибе һәм компетенциясе билгеләнә.

Икенче закон нигезендә Татарстан Республикасы Дәүләт киңәшчесе Татарстан Республикасы Дәүләт Советында закон чыгару инициативасы хокукы бирелә, шулай ук Конституция буенча аны әлеге вазифага билгеләгәндә Дәүләт Советы һәм Татарстан Республикасы Президенты вәкаләтләре тәгаенләнә.

30 мартта Татарстан Республикасы Президенты Рөстәм Миңнехановка ике автоматлаштырылган системаны тәкъдим иттеләр. Киңәшмә ТР Хөкүмәте Йортында узды. ТР икътисад министры вазифаларын башкаручы Марат Сафиуллин максатчан программаларны исәпкә алу буенча дәүләт автоматлаштырылган системасын һәм капитал салулар программасын формалаштыру һәм аны күзәтү буенча мәгълүмати-аналитик системаны тәкъдим итте.