ЯҢАЛЫКЛАР

Алабуга районының Морт авылында Ватанны саклаучылар көненә багышланган мәдәни-ял чаралары декадасы башланып китте. Биредә герой-шагыйрь Муса Җәлилгә багышланган шигырь конкурсы уза. Конкурс искә алу кичәсе белән төгәлләнәчәк.

17 февраль көнне ТР Президенты Минтимер Шәймиев Кремльдә ил һәм республика үсешенә лаеклы өлеш керткән бер төркем хезмәт алдынгысына Россия һәм Татарстанның югары дәүләт бүләкләрен тапшырды. Тантаналар залына җыелган алдынгылар - хезмәтләре белән төрле тармакларда танылучылар. Алар арасында терлекче, токарь, агроном да, сәнгать әһелләре, дәүләт эшлеклеләре, эре предприятие, муниципалитетлар җитәкчеләре, табиблар, галимнәр дә бар.

17 февраль көнне Түбән Камада Татарстан Республикасы Дәүләт Советы Президиумының күчмә утырышы уза. "ТАНЕКО" нефть эшкәртү һәм нефть химиясе заводлары комплексы" проектын гамәлгә ашыруның барышы белән танышу утырышның көн тәртибендәге төп мәсьәлә булачак.

Дәүләт Советының матбугат хезмәтеннән хәбәр итүләренчә, әлеге проект 2004-2008 елларга исәпләнгән ТР Нефть һәм газ химиясе комплексын үстерү республика программасы кысаларында һәм 2005 елда кабул ителгән ТР Куркынычсызлык советы карары нигезендә гамәлгә ашырыла. Комплекс составында бер-берсе белән үзара бәйле өч заводны (нефть эшкәртү заводы, нефтьне тирәнтен эшкәртү заводы һәм нефть химиясе заводы) этаплап төзү күздә тотыла, алар 18 төрдәге продукция эшләп чыгарачак.

16 февраль көнне Мәскәүдә, Бөтенроссия күргәзмәләр үзәгендә, текстиль һәм җиңел сәнәгать товарлары, җиһазларының "Текстильлегпром"дип аталган XXXIV федераль ярминкәсе ачылды. Рәсми ачылыш тантанасында сәнәгать һәм сәүдә министры урынбасары Олег Власов җитәкчелегендәге Татарстан делегациясе катнашты.

Татарстанның җиңел сәнәгать предприятиеләре федераль ярминкәдә республиканың уртак экспозициясендә тәкъдим ителә. Алар - "Стиль", "Казан өйдә эшләүчеләр комбинаты" ҖЧҖ, "Кукмара тегү фабрикасы", "Кукмара киез итек фабрикасы", "Мелита", "Адонис", "Алсу", "Бамбл-Би" ААҖ.

Идел буе федераль округы төбәкләренә "Электрон Хөкүмәт" һәм документларның электрон әйләнеше системасын унификацияләү турында уйланырга кирәк. Бу хакта бүген Казанда Россия Президентының Идел буе федераль округындагы Тулы вәкаләтле вәкиле Григорий Рапота дәүләт кадрлар сәясәте координацион советының "Идел буе федераль округында дәүләт гражданнар хезмәтендә мәгълүмати ачыклык һәм мәгълүмати сәясәтне чынга ашыру" темасына багышланган киңәшмәдә белдерде. Киңәшмәдә Татарстанның Премьер-министры Рөстәм Миңнеханов та катнашты.

Григорий Рапота үз чыгышында билгеләп үткәнчә, хәзерге вакытта Россиядә административ реформа бара, аның кысаларында яңа үзгәрешләр кертү планлаштырыла. "Тиешле хокук кыры булдырылды, электрон хезмәтләр күрсәтелә, "Электрон Хөкүмәт" системасы, "бер тәрәзә" принцибы буенча күп функцияле үзәкләр эшли, хакимият органнарының компьютерлары яңартылды. Әлегә төрле җирдә нәтиҗәләр төрлечә, бөтен төбәкләр дә бу юнәлештә эшли", - диде Идел буе федераль округындагы Тулы вәкаләтле вәкил.

17 февраль көнне Казан мэры Илсур Метшин чираттагы мәртәбә республика социаль ипотека программасы буенча төзелеш эшләренең барышын тикшерде, дип хәбәр итә Казан мэриясенең матбугат хезмәте.

Шәһәр башлыгы әлеге проектны гамәлгә ашыруның әһәмияте турында күп тапкырлар ассызыклады. Ел ахырына кадәр 400 мең квадрат метр торак төзеп өлгерү өчен, инде бүген үк барлык объектларда да эш - ике, ә мөмкинлек булган җирдә өч сменада алып барылырга тиеш.

Казан Кремльдә РФ Президентының Идел буе федераль округындагы вәкаләтле вәкиле Григорий Рапота һәм ТР Президенты Минтимер Шәймиев 45 татарстанлыга юбилей медальләрен тапшырды.

15 февраль көнне республикабызның Кайбыч, Югары Ослан, Кама Тамагы, Апас, Буа, Тәтеш, Чүпрәле районнарында һәм Казан шәһәрендә Бөек Ватан сугышында җиңүгә 65 ел тулуга багышланган "Хәтер маршы-2010" яшьләр сәфәренең беренче этабы старт алды. Чараны "Ватан" иҗтимагый яшьләр оешмасы белән берлектә Татарстанның Яшьләр эшләре, спорт һәм туризм, Мәгариф һәм фән министрлыклары оештыра.

16 февраль көнне Г.Тукай исемендәге Татар дәүләт филармониясендә легендар татар җырчысы, Россиянең һәм Татарстанның халык артисты Илһам Шакиров 75 яшьлек юбилеен билгеләп узды. Тамашачылар татар халкының яраткан җырчысын басып каршы алды. Бу бәйрәм кичендә җырчыны ТР Премьер-министры урынбасары - мәдәният министры Зилә Вәлиева котлады.

24 февральдә Мәскәүдә 21 февраль - ЮНЕСКО тарафыннан гамәлгә куелган Халыкара туган тел көненә багышланган халыкара фәнни-гамәли конференция уза. Анда Мәскәү һәм Татарстанның күренекле галимнәре, мәдәният һәм җәмәгать эшлеклеләренең катнашуы көтелә. Конференцияне Мәскәүнең "Туган тел" татар мәдәнияты җәмгыяте һәм башкаланың Көнчыгыш, Зеленоград, Төньяк, Үзәк округлары татарларының җирле милли-мәдәни мохтариятлары оештыра.