ЯҢАЛЫКЛАР

Социаль хезмәткәрләр 2009 елда башкарган эшчәнлегенә нәтиҗә ясады һәм агымдагы елга бурычлар билгеләде. 2 февраль көнне Казанда узган ТР Хезмәт, мәшгульлек һәм социаль яклау министрлыгының коллегия утырышында ТР Премьер-министры Рөстәм Миңнеханов катнашты.

2 февраль көнне Казан мэры Илсур Метшин һәм ТР Президенты каршындагы Дәүләт торак фонды башкаручы директоры Тәлгат Абдуллин Татарстан башкаласында республика социаль ипотека программасын гамәлгә ашыруның барышы белән танышу максатыннан берничә объектта булды.

Глушко урамындагы 6А-1 санлы кирпеч йортның беренче катында Казан мэры һәм Дәүләт торак фонды башкаручы директоры киңәшмә үткәрде. Киңәшмәдә Казан башкарма комитеты җитәкчесе урынбасары Эмиль Хөснетдинов, Казанның Торак инвестиция компаниясе директоры, генподряд һәм субподряд оешмалары җитәкчеләре катнашты. Очрашу барышында төзелешне үз вакытында финанслау, башкарылган эш төрләре буенча актлар һәм тиешле техник документлар тәкъдим итүгә бәйле проблемалар хакында фикер алышынды. Шулай ук Глушко урамындагы 6А-1, 5-19 һәм 5-20 санлы йортларны быелның февралендә файдалануга тапшыру мәсьәләсе игътибар үзәгендә булды.

Киңәшмәдә катнашучылар "Кояшлы шәһәр" микрорайонындагы төзелеш мәйданчыкларын карады, биредә 2010 елда социаль ипотека программасы буенча 50 мең квадрат метр торак файдалануга тапшыру күздә тотыла. Алар объектта дүрт күпфатирлы йортны карады, аларны төзүчеләр инде быелның икенче кварталында ук тапшырырга ниятли.

Шуннан соң шәһәр түрәләре Ю.Фучик урамындагы төзелеш мәйданчыгы белән танышты, биредә социаль ипотека программасы буенча гомуми мәйданы 50 мең квадрат метрга якын тәшкил иткән биш күп катлы торак йорт төзелә.

"Сәләт" республика яшьләр иҗтимагый хәрәкәте бу атнада 15 еллыгын зурлап билгеләп үтәргә җыена. Бәйрәм программасы һәм аның үзенчәлекләре хакында бүген журналистларга "Татмедиа" агентлыгында узган очрашуда "Сәләт" проекты җитәкчесе, КДУ профессоры Җәүдәт Сөләйманов һәм проектлар идарәчесе Тимур Сөләйманов сөйләде.

Беренче адымнарын Татарстанның талантлы балалары өчен җәйге лагерьлардан башлаган "Сәләт" ни өчен туган көнен февраль аенда бәйрәм итәргә булган? Каләм ияләрен иң элек әнә шул сорауга җавап кызыксындырды. "Сәләт"нең чишмә башында торган алыштыргысыз җитәкчесе Җәүдәт Сөләйманов моны бик гади итеп - уңайлы вакытка туры китерү белән бәйләп аңлатты. Аның белдерүенчә, республиканың сәләтле балаларын бер мәйданга туплаучы җәйге аланнар булдыру идеясе 1993 елның сентябрендә туа. 1994 елның җәендә инде сәләтле татар балалары өчен беренче компьютер лагере ачыла. Ә бүген инде ул сәләтле балалар һәм яшьләр өчен Татарстанның төрле төбәкләрендә, Россиянең Анапа шәһәрендә, Болгария, Чехиядә 13 уку-укыту һәм сәламәтләндерү аланы оештыручы, 20 гә якын проектны гамәлгә ашыручы, гомумән, сәләтле балалар һәм үсмерләрнең уртак яшәү нормалары, гореф-гадәтләренең бердәмлегеннән торган тулы бер система. "Узган ел Татарстанда яшьләр сәясәтенең 15 еллыгы да зурлап билгеләп үтелде. "Сәләт"нең 15 еллыгы бу форум кысаларында аерым билгеләнде. Иҗтимагый хәрәкәтнең эшчәнлеге дәүләт бүләкләре белән дә билгеләп үтелде. Без инде аерым юбилей чаралары уздырмаска да уйлаган идек", -ди Җәүдәт Сөләйманов. "Сәләт"леләрнең күңел түрләрендә йөрткән ниятләрен Яшьләр эшләре, спорт һәм туризм министры Марат Бариев сизгән, күрәсең. Ул эшчәнлеккә иркенләп нәтиҗәләр ясау өчен 15 еллыкны аерым билгеләп үтү тәкъдимен керткән. Һәм менә 5 февральдә "Сәләт" дистә елдан артык вакыт эчендә башкарылган эшләре хакында җәмәгатьчелек алдында хисап тотачак. "Шул рәвешле без "Сәләт"не эчке яктан, төрле елларда анда чыныгу узган, тәрбияләнгән яшьләребез аша күрсәтергә телибез", - ди Җәүдәт Сөләйманов.

Бары объектив мәгълүмат булганда гына хакимият органнары уңай нәтиҗәләргә ирешү өчен үз вакытында чишелешләр табып, бара торган вакыйгаларга йогынты ясый ала. ТР Премьер-министрының беренче урынбасары Равил Моратов статистика органнары хезмәтенең әһәмиятен әнә шулай бәяләде. Ул узган елларда статистика органнарының нәтиҗәле эшчәнлеге ярдәмендә күп проблемалар чишелүгә басым ясап, аларга лаеклы эшләре өчен Хөкүмәт исеменнән рәхмәт белдерде. Әмма тынычланырга иртәрәк. Алда статистика органнарын тагын да зуррак эшләр көтә.

Моңарчы тулысынча чишелеш тапмаган, мәсьәләләрне хәл итәргә кирәк булачак. Шуларның берсе- статистика органнарының муниципалитетларда электрон хуҗалык хисабын оештыру. Мондый хисап 63 авыл җирлегендә бөтенләй алып барылмый, 81 ендә яртылаш кына кулланыла. Бу төбәктәге җир кишәрлекләре, торак фонды, терлекчелек һ.б. мәгълүматлар туплауга кагыла. 17 муниципалитетта бу мәсьәләне үзәкләштереп хәл итәрлек җаваплы кеше билгеләнмәгән. Равил Моратов бу вазифаны урыннардагы ведомствоара комиссияләр җитәкчеләренә йөкләүне тәкъдим итте.

2 февраль көнне кич республикага Тышкы сәүдә һәм үсеш министры Пааво Вяюрюнен җитәкчелегендә Финляндиянең эшлекле даирә вәкилләре делагациясе киләчәк. 44 кешене берләштергән төркем составында министрлык, ведомстволар вәкилләре, компанияләр җитәкчеләре булачак, дип хәбәр итә ТР Сәнәгать һәм сәүдә министрлыгының матбугат хезмәте.

Ә иртәгә "Мираж" кунакханәсенең конференцияләр залында Татарстан-Финляндия эшлекле форумы эшли башлый. Форум программасына Суоми иле эшмәкәрләренә Татарстанның икътисади-сәүдә потенциалын, 2013 елда Казанда Узачак Универсиада проектын тәкъдир итү, шулай ук нефть-газ, автомобиль сәнәгате өлкәсендәге проектлар презентациясе кертелгән. Форум кысаларында Лахти шәһәрендәге Инновацияле технология үзәге белән "Идея-Көньяк-Көнчыгыш" инновация технопаркы арасында хезмәттәшлек Меморандумын имзалау каралган.

Мәскәүдә РФ Дәүләт Думасында Татарстаннан депутат, Иран Ислам Республикасы парламенты (мәҗлесе) белән элемтәләр буенча депутатлар төркеме координаторы Хафиз Салихов Иран Сәүдә палатасы делегациясе белән очрашты.

Россиягә эшлекле визит белән килгән делегацияне Иран Сәүдә палатасы рәисе Мөхәммәд Нехавендиян җитәкли. Очрашуда шулай ук Иран һәм Россиянең катнаш сәүдә палатасы рәисе Әсәдолла Әсгар-Әүлади, Тәһран Сәүдә-сәнәгать палатасы вице-президенты, палатаның идарә әгъзасы һәм казначысы Шаһрох Заһири, әлеге төбәк оешмасының генераль секретаре Мәһди Расех, Иран Ислам Республикасының Мәскәүдәге илчелеге вәкилләре, РФ Сәүдә-сәнәгать палатасының Россия-Иран эшлекле советы генераль директоры Олег Акулиничев катнашты.

Быелның июнендә Казанда “Ашкайнату системасындагы яман шешләрне диагностикалау һәм дәвалау” исемле Халыкара конгресс узачак. Чара РФ атказанган фән эшлеклесе, профессор Мойше Сигал тууына 90 ел тулуга багышлана.

Билгеле булганча, Мойше Сигал яман шешләрне ачыклауда цитологик ысулын куланылышка кертә. 50-60 елларда Казан онкология мәктәбенә нигез салучылар Юрий Ратнер һәм Мойше Сигал була.

Автогигант һәм аның Татарстаннан читтәге кече предприя­тиеләре елның беренче аенда җитеш­терү планын тулысынча үтәгән. КамАЗ­ның төп производствосы – автомобиль заводы 1788 машина комплекты, шул исәптән 1694 әзер автомобиль һәм шосси эшләп чыгарган.

Ил базарында автомобильләр сату күләменең акрынлап арту – предприятие өчен бигрәк тә сөенечле хәл. Гыйнвар аенда, дәүләт заказыннан тыш, бер меңнән артыграк “КамАЗ” йөк автомобиле сатылган. 2009 елның шушы чорындагыга караганда өч тапкырга диярлек күбрәк бу.

Тиз арада дәүләт ярдәме күрсәтү комиссиясе Россия Хө­күмәтенә 27 моношәһәрне яңарту программасын тәкъдим итәргә җые­на. Алар арасында Татарстаннан да ике кала бар.

Хөкүмәт ярдәмен барлыгы 335 шәһәр алыр дип көтелә. Аларны “аякка бастыру” өчен якынча 100 миллиард сум акча кирәк булачак. Тик әлегә җитәкчеләр алай ук зурдан кубу яклы түгел. Иң беренче чиратта 27 каланы коткармакчылар. Бу эшкә 20 миллиард сум тирәсе тотылачак. “Дәүләт акчаны болай гына таратып чыкмаячак”, – дип кисәтә Россиянең төбәкләр үсеше министры Виктор Басаргин. Аның сүзләренә караганда, программаның төп максаты – җирле тү­рә­ләрне һәм шәһәрне “тотып торучы” оешма җитәкчеләрен кыймылдарга мәҗбүр итү.

Чаллыда, әйтик, КамАЗ җитәкчелегенә күбрәк йөгерергә һәм баш ватарга туры киләчәк. Кама Ала­нының төп оешмасы дип “Кама Аланы” индустрия паркы аталган. Мәскәү бирәчәк акчаны ни дәрә­җәдә дөрес файдаланулары хәзер инде җирле түрәләрнең үзләреннән тора.

Башкалада югары уку йортлары укытучылары көч сынаша. Казанда “Сәламәтлек” спар­такиадасы башланды. Кичә хатын-кызлар арасында волейбол ярышы буенча алдынгыларны билгеләделәр. Бүген исә ир-атлар мәйдан уртасына чыгачак. Моннан тыш Казан югары уку йортлары мөгаллимнәре өстәл теннисы, баскетбол, йөзү, чаңгыда узышу кебек ярышларда җиңү­челәрне билгеләячәк. Бәйге 6 февральдә тәмамлана.