ЯҢАЛЫКЛАР

"Иң мөһиме - без мөселман өммәтенең бердәмлеген саклап кала алдык". Татарстан мөфтие, ТР мөселманнары Диния нәзарәте рәисе Госман хәзрәт Исхакый 27 февральдә узачак ТР Мөселманнарының IV съезды алдыннан ТР мөселманнары Диния нәзарәте эшчәнлегенең нәтиҗәләре хакындагы сорауга әнә шулай дип җавап бирде.

Госман хәзрәтнең сүзләренә караганда, 12 ел эчендә шактый эш башкарылган: Диния нәзарәте каршында пропаганда, дәүләт структуралары, хәрбиләр, җәзаларны үтәтү Федераль хезмәтенең ТР буенча баш идарәсе учреждениеләре белән үзара хезмәттәшлек, зәкят, хаҗ, вакыф бүлекләре, шулай ук "Хәләл" стандар комитеты оештырылган.

Төбәкара клиника-диагностика үзәгендә Швейцариянең Женева клиникасы һәм кафедрасы җитәкчесе, нейрохирург, Аурупада эпилепсияне дәвалау өлкәсендә танылган табиб профессор Карл Шайлер булып китте. Аны ТР сәламәтлек саклау министры урынбасары Адель Вафин җитәкчелегендәге вәкиллек озатып йөрде. Вәкиллек составында Россия медицина фәннәре академиясе академигы, профессор, биологик психиатрия бүлеге башлыгы, лаборатор иммуногистохимия җитәкчесе Владимир Чехонин да бар иде.

1 февраль көнне Хөкүмәт йортында ТР Премьер-министры Рөстәм Миңнеханов рәислегендә "Татнефть" ААҖ Директорлар советының чираттагы утырышы узды. Анда 2009 елда компаниянең бюджеты үтәлеше йомгаклары игълан ителеп, февраль аена бюджет кабул ителде.

Министрлар Кабинетының матбугат хезмәтеннән алынган мәгълүматларга караганда, утырышта, аерым алганда, нефть сайланыш нормалары һәм 2009 елда запаслар үсеше хакында сүз булган. Хисап чорында компаниягә караган предприятиеләр тарафыннан ятмалардан 25,85 млн. тонна "кара алтын" чыгарылган. Шул рәвешле, 2008 ел күрсәткече, 0,33 процентка арттырылган. Узган елда 280 яңа скважина кулланышка кертелгән. Яңа скважиналарның уртача дебиты тәүлегенә 9,5 тонна тәшкил иткән. Узган ел табылган барлык нефть күләменең 45 процентка якын өлешен ятмаларның нефть бирү сәләтен күтәрү ысулларын куллану тәэмин иткән. Бу чорда югары үзле нефть табу буенча тәҗрибә-сәнәгать эшләре уңышлы дәвам иткән.

1 февраль көнне "Казан" милли-мәдәният үзәгендә үткән коллегия утырышында Суд приставлары федераль хезмәтенең ТР идарәсе 2009 елдагы эшчәнлеккә йомгак ясады. Утырыш Премьер-министр Рөстәм Миңнеханов катнашында узды.

Яңа Россия шартларында суд приставлары әле 13 ел элек кенә барлыкка килсә, бу хезмәтнең тамырлары гасырларга барып тоташа. Быел суд приставлары хезмәте оешуга 145 ел тула. Исеме шул ук каласа да, бүгенге заманда суд приставларының эшчәнлеге элеккедән шактый аерыла. Яңа Россия шартларында суд приставлары РФ Конституция, Югары, Югары арбитраж судлары, гомуми юрисдикциядәге судлар, җәмәгать һәм арбитраж судлары карарлары үтәлеше өчен җавап бирә.

Татарстан Республикасы парламент делегациясенең АКШка тәүге визиты төгәлләнде.

Рәсми визит кысаларында Фәрит Мөхәммәтшин АКШ Конгрессы һәм Сенатында, Ак йортта, Милли куркынычсызлык советында берничә очрашу үткәрде, Нью-Йорк штаты парламенты белән үзара аңлашу турындагы Меморандумга кул куйды, Нью-Йорк штаты дәүләт университеты ("State University of New York" (СУНИ) белән берләштерелгән югары уку йортлары җитәкчеләре һәм укытучылар белән очрашты.

Татарстан парламенты башлыгы шулай ук Олбани университеты ректоры белән очрашты, Нью-Йорк штаты дәүләт университеты көллиятендә булды. Көллияттә Татарстанның "Идея" инновация-җитештерү технопаркы тәкъдим ителде.

Татарстан галимнәре Россия агрономия форумында катнаша. Киңәшмәдә 2009 елда үсемлекчелек тармагында башкарылган эшкә нәтиҗә ясалачак. Татарстаннан форумда ТР буенча "Россия авыл хуҗалыгы үзәге" федераль дәүләт учреждениесендә эшләнгән "Агросемэксперт" программасы авторлары катнашачак. Бу хакта әлеге филиалның җитәкчесе Таһир Һадиев хәбәр итте.

4-5 февраль көннәрендә РФ Авыл хуҗалыгы министрлыгында Россия Федерациясе субъектларының агросәнәгать комплексы органнары җитәкчеләре урынбасарлары, Россия авыл хуҗалыгы академиясенең структур бүлекчәләре җитәкчеләре, РФ Авыл хуҗалыгы министрлыгы карамагындагы учреждение башлыклары, тармак ассоциацияләре һәм берлекләре вәкилләре катнашында агрономия киңәшмәсе узачак.

Киңәшмәдә 2009 елда үсемлекчелек тармагында башкарылган эшкә нәтиҗә ясалачак, авыл хуҗалыгын үстерү буенча Дәүләт программасындагы килешүләрне үтәүгә кагылышлы мәсьәләләр каралачак. Киңәшмәдә катнашучыларга тауар җитештерүчеләрне язгы авыл хуҗалыгы эшләрен үткәрү өчен кредит, матди-техник һәм башка ресурслар белән тәэмин итү турында мәгълүмат бирәчәкләр.

30 гыйнварда Казанда Татарстанның Мәдәният министрлыгының 2009 елдагы эшчәнлегенә йомгак ясау һәм 2010 елга планнар коруга багышланган Коллегия утырышы узды. Анда ТР Премьер-министры Рөстәм Миңнеханов, республикабызның мәдәният министры Зилә Вәлиева, министрлык, аның карамагындагы ведомстволар, учреждениеләр вәкилләре, муниципаль районнар мәдәният бүлекләре башлыклары, иҗади берләшмәләр җитәкчеләре катнашты.

Зилә Вәлиева сүзләренә караганда, 2009 елда министрлык мәдәният өлкәсендәге сәясәтне камилләштерү, өлкә белән идарә итүнең яңа формаларын, механизмнарын кулланылышка кертү, Татарстан мәдәниятен гомумроссия һәм дөнья мәдәни киңлегендә таныту, бүгенге заман мәгълүмат технологияләрен файдаланып, китапханәләр системасын яңарту юнәлешләрендә эш алып барган.

Бүгенге көндә Татарстанда 2010 елда социаль ипотека программасын финанслау өчен предприятиеләр белән 3,2 миллиард сумлык килешү төзелгән. Бүген ТР Министрлар Кабинетында узган киңәшмәдә ТР җир һәм мөлкәти мөнәсәбәтләр министры Азат Хамаев әнә шундый мәгълүматлар китерде.

А.Хамаев китергән мәгълүматлар буенча, 24 районда барлык предприятиеләр дә ТР Дәүләт торак фондына ирекле кертемнәр турында килешү төзегән. Кайбер районнарда килешүләрнең күләме план биременең 70 процентына да җитмәгән. Казан буенча килешүләр план биременең 89 проценты күләмендә төзелгән, әмма кайбер районнарда бу күрсәткеч 50 проценттан кимрәк.

Татарстандагы 83 зур предприятиенең 62 се килешү төзегән инде. 31 кече нефть компаниясенең 30 ы килешүгә кул куйган. Тулаем алганда, Азат Хамаев хәбәр иткәнчә, план биременең 79 проценты күләмендә 3,2 миллиард сумлык килешү төзелгән.

"Соллерс-Чаллы" ААҖ иске автомобильләрне утильләштерү буенча тәҗрибә проектында катнашырга әзер. ТР Сәнәгать һәм сәүдә министрлыгы вәкилләренең предприятиегә сәфәре вакытында шул хакта сөйләшү булган.

Предприятие вәкиләре белдерүенчә, иске автомобильләрен тапшырырга теләк белдереп һәм бу процедура турында җентекле мәгълүмат алырга теләп шалтыратучылар күп булган. Гражданнар иске автомобильләрен ЮХИДИ теркәвеннән төшерүне, аны утильләштерүгә тапшыруны үзләре башкарырга әзер булуын белдерә. Бу хакта кулларына таныклык алгач, алар үзләренә охшаган яңа автомобиль маркасын сайлый алачак.

Билгеле булганча, РФ Сәнәгать һәм сәүдә министрлыгының норматив документларында әлегә эксперементның барлык яклары да тасвирланмаган, шуңа күрә андагы кайбер нигезләмәләргә ачыклык кертелергә тиеш.

"Алабуга" махсус икътисади зонасының перспективалары резидент-компанияләр үсешенә бәйләнгән. Хәзерге вакытта биредә 9 резидент теркәлгән. Алар - "Соллерс -Алабуга" ҖЧҖ, "Северстальавто-ИСУЗУ", "Полиматиз" ЯАҖ, "Роквул-Волга", "П-Д Татнефть-Алабуга Стекловолокно", "Эр Ликид Алабуга" ҖЧҖ, "Акульчев-Алабуга", "Септал" ҖЧҖ, "Инженерлык җиһазлары заводы" ЯАҖ. Шуларның беренче өчесе актив җитештерү-хуҗалык эшчәнлеген алып бара. Махсус икътисади зона ачылган көннән бүгенгәчә аның территориясендә 15 мдрд. сумнан артык продукция җитештерелгән, шуның 7,6 млрд. сумга якыны 2009 елга туры килә. Биредә 1,7 меңгә якын эш урыны булдырылган, барлык дәрәҗәдәге бюджетларга барлыгы 700 млн. сумнан артык түләүләр күчерелгән.

Быел әлеге җитештерү мәйданы территориясендә "П-Д Татнефть-Алабуга Стекловолокно" ҖЧҖ производствосын эшләтеп җибәрү ниятләнә. Ул "Татнефть" ААҖ белән Алманиянең пыяла җепселләр җитештерүче Preiss-Daimler компаниясенең уртак предприятиесе. Быел "Алабуга" мәйданында "Эр Ликид Алабуга" ҖЧҖ производствосын ачу да ниятләнә (Техник һәм медицина газларын җитештерүдә дөнья лидеры Air Liquide компаниясенең бүлендек предприятиесе).