ТР Актаныш районында Шәрип Шәймиев турындагы китап тәкъдим ителде

Бүген Татарстан Актаныш районы Пучы авылы Мәдәният йортында Татарстанның беренче Президентының әтисе – Шәрип Шәймөхәммәт Шәймиев турындагы китап тәкъдим ителде. “Сагыну” (“Помним”) китабы талантлы җитәкче һәм үз вакытында танылган шәхеснең туганнары, балалары, оныклары, оныкчыклары, шулай ук авылдашлары һәм хезмәттәшләренең хатирәләреннән тора. Бу чарада Татарстан Республикасы Дәүләт киңәшчесе Минтимер Шәймиев катнашты.

Шәрип Шаймиев яшь килеш колхоз рәисе итеп сайланган һәм 25 ел буе бу вазыйфаны башкарган. Ул таләпчән җитәкче буларак, эшендә югары нәтиҗәләргә ирешкән. Китап Шәрип Шәймиевнең тууына 110 ел тулуга багышланган.

Әнәк һәм Пучы авылларында яшәүчеләр Шәрип Шәймиевнең яхшы эшләре турында хәтерли, аларның күбесе легенда буларак буыннан буынга тапшырылган. Бүген сәхнәдә Шәрип Шәймиевнең яраткан җырлары яңгырады, данлы якташның тормышыннан кызыклы мизгелләр уйналды, иске фоторәсемнәре “җанланды”.

Китапны төзүче һәм мөхәррир – танылган язучы Нәбирә Гыйматдинова китап озак әзерләнде, күп санлы әңгәмәләр үткәрелде дип белдерде. Ул Шәрип Шәймиевнең туганнарына һәм якташларына китап чыгаруда ярдәмнәре һәм теләктәшлекләре өчен рәхмәт белдерде. Аның сүзләренә караганда, бу Шәрип Шәймөхәммәт улына булган чиксез хөрмәтнең халык йөрәгендә мәңгегә саклануын дәлилли. Китапта архивтагы фоторәсемнәрдән тыш, Казанның танылган фоторәссамнары Евгений Канаев белән Солтан Исхаков эшләре дә файдаланылган.

Татарстанның беренче Президенты Минтимер Шәймиев үз чыгышында, бүген әтисе турындагы китапны тәкъдим итү уңаеннан очрашу әһәмияткә ия һәм һәркем өчен кирәкле, чөнки һәркемнең әтисе, әнисе, бабае, әбисе булган һәм бар, теләге булган һәркем үз якыннарын искә алып, кичә оештыра һәм китап чыгара ала, дип билгеләп үтте.

Минтимер Шәймиев Нәбирә Гыйматдиновага һәм китапны нәшер итүдә катнашучыларга рәхмәт белдерде. Ул шулай ук авылдашларына әтисе турында җылы сүзләр белдерүе өчен рәхмәт сүзләре җиткерде.

Шәрип Шәймиев оныгы – ТР энергетика министры Илшат Фәрдиев: “Шәрип бабай – ил өчен иң авыр вакытларда гади кешеләр проблемалары белән яшәгән кешеләр образы. Бу бик кирәкле китап, без үз тарихыбызны белергә тиеш”, - дип белдерде.

Сәхнәдә Ш.Шәймиевнең балалары, оныклары, оныкчыклары һәм авылдашлары – кызы Мәдәния Ильясова, оныгы - ТР җир һәм милек мөнәсәбәтләре министры Азат Хамаев, ветеран укытучы Хәдичә Әхмәдуллина, ТР Актаныш районы башлыгы Энгель Фәттахов һ.б. үз хатирәләре белән уртаклашты.