Минтимер Шәймиев: "Хәзер - хакыйкать мизгеле"

Бүген ТР Дәүләт киңәшчесе Минтимер Шәймиев җәмәгате Сәкинә ханым белән Казандагы 57 нче сайлау участогында РФ Президентын сайлап тавыш бирделәр.

Республиканың югары дәүләт вәкилен әлеге сайлау участогы урнашкан Казан илкүләм тикшеренү технология университеты (КДТУ) ректоры Герман Дьяконов һәм яшь артистлар татарча парлы бию белән каршы алды, биредә җыйнак кына концерт программасы әзерләгәннәре беленде. Шәймиевләр башта сәүдә рәтләрендә тәкъдим ителгән ризыкларны күздән кичерде, бигрәк күңелле икән сездә, дип, Минтимер әфәнде кешеләр белән аралашты, хәл-әхвәл сорашты.

“Президент сайлауда бик җаваплылык белән эш итү таләп ителә. Президентлыкка кандидатларны белә идек, сайлау алды кампаниясе чорында аларны тагын да яхшырак өйрәнү мөмкинлеге булды, инде арадан берсен сайларга - хакыйкатькә вакыт җитте. Безнең күп милләтле Татарстан халкы, һәрбер акыллы кеше кемне сайларга кирәклеген бик үлчәп, җаваплылыкны сизеп-тоеп, иң яхшы кандидатны Президент итеп сайлар дип уйлыйм һәм минем моңа шигем юк”, - Минтимер Шәрип улы гражданлык бурычын үтәгәннән соң, журналистлар белән әңгәмәләшүендә шулай дип белдерде.

Сәкинә һәм Минтимер Шәймиевләрне ТР буенча эчке эшләр министры Әсгать Сәфәров, Республика матбугат һәм массакүләм коммуникацияләр агентлыгы җитәкчесе Марат Моратов һ.б. рәсми затлар озатып йөрде.

Шушы сайлау участогы комиссиясе җитәкчесе Татьяна Гарифуллина сүзләренчә, участокка теркәлгән 1743 сайлаучының сәгать 10га кадәр 9 проценты инде тавыш биреп өлгергән.