Минтимер Шәймиев "Саклаучы" сынын Болгарда урнашуы буенча киңәшмә үткәрде

Болгарда “Саклаучы” сынын урнаштыру урыны үзгәртеләчәк. Бүген ТР Дәүләт Киңәшчесе Минтимер Шәймиев гаммәви мәгълүмат чаралары вәкилләренә әнә шулай дип белдерде.
 Искәртеп узабыз, 21 майда – Идел Болгарстанында Ислам динен рәсми рәвештә кабул итү көнендә Болгарда “Саклаучы” сынын урнаштыру турындагы мәгълүмат җәмәгатьчелектә төрле фикерләр уятты. 12 метр биеклегендәге сын Италиядә коелган, аны апрель башында Казанга алып кайтачаклар. Баштарак сынны Болгардагы Истәлек билгесе һәм Җәмигъ мәчете арасында урнаштырырга ниятләгәннәр иде.
 Бүген Казан Кремлендә ТР Президенты Рөстәм Миңнеханов күрсәтмәсе буенча ТР Дәүләт Советы М.Шәймиев рәислегендә һәм мөселман руханилары, галимнәр, мәдәният эшлеклеләре катнашында эксперт советы утырышы булды, алар сынга карата үз фикерләрен җиткерде.
 Минтимер Шәймиев утырыш төгәлләнгәннән соң журналистларга белдергәнчә, Даши Намдаковның “Саклаучы” сынын, аның составына болгар цивилизациясе музеен да кертеп, икенче җиргә урнаштырырга карар кылынган. Ул музей янындагы күзәтү мәйданчыгында урнаштырылыр дип көтелә. Хәзерге вакытта белгечләр әлеге мәсьәләне җентекләп өйрәнә.
 “Әлеге сын зурлыгы ягыннан тарихи һәйкәлләрдән өстен тора дип әйтеп булмый. Безгә Даши Намдаковның бу эше шунда ук ошады, чөнки ул яклаучы ананы, үз җирен, балаларын саклаучы хатын-кызны гәүдәләндерә. Моны рәссамның авторлык эше, аның күзаллавы икәнлеген дә искә алырга кирәк”, - диде М.Шәймиев.
 Ул шулай ук бүгенге көндә танылган сынчы Даши Намдаковның эшләре дөньяның барлык почмакларында саклануын билгеләп үтте.