Казанда мәшһүр татар дин галиме Шиһабетдин Мәрҗанига һәйкәл ачылды

Бүген Казанның Кабан күле яр буенда мәшһүр татар дин эшлеклесе һәм галиме Шиһабетдин Мәрҗанига һәйкәл ачылды. Тантанада Татарстан Республикасы Президенты Рөстәм Миңнеханов һәм Татарстан Республикасы Дәүләт Киңәшчесе Минтимер Шәймиев катнашты. 

Рөстәм Миңнеханов тантанага җыелганнарны Мәүлид ән Нәби – Пәйгамбәребез Мөхәммәд туган көн белән котлады. “Бу көнне без татар халкының бөек улы – дин галиме һәм фәйләсуф Шиһабетдин Мәрҗанига һәйкәл ачабыз. Ул үз хезмәтләре белән татар халкы мәгърифәтенә зур өлеш керткән. Бу проектны гамәлгә ашыруда катнашучыларның барысына да рәхмәтемне җиткерәсем килә”, - дип ассызыклады ТР Президенты. 

Минтимер Шәймиев үз чиратында Шиһабетдин Мәрҗани – хезмәтләре бик озак еллар өйрәнеләчәк бөтен дөньяга мәгълүм эшлекле, дип өстәде. “Шиһабетдин Мәрҗани – безнең горурлыгыбыз, халкыбызның байлыгы. Аның турында күбрәк сөйләргә, кешеләрне аның күпкырлы эшчәнлегенең бөтен яклары, тарихка керткән өлеше белән таныштырырга кирәк. Бигрәк тә бу Казанга килеп торучы туристлар агымы арткан көннәрдә актуаль”, - дип билгеләде ул. 

Скульптура Шиһабетдин Мәрҗаниның тууына 200 елны бәйрәм итү кысаларында куелды. Һәйкәл бөек татар скульпторы Баки Урманче проекты буенча ак мәрмәрдән эшләнгән. Плитәләренә дин галименең “Хакыйкать һәм туры юл бар нәрсәләрдән өстен” дигән сүзләре язылган.