Державинны хөрмәтләп

14 июльдә Лаеш районы үзәгендә Гавриила Державинның тууына 260 ел тулуга багышланган тантана булды. Аны Татарстан Президенты Минтимер Шәймиев һәм Лаеш районы хакимияте башлыгы Александр Тимофеев ачты.

Үзәк мәйданга атаклы якташны хөрмәтләү өчен халык җыелды. Күренекле датага монда бик күп эш эшләнде. Минтимер Шәймиев әйткәнчә, Державин өчен Татарстанның йөзе кызарырлык түгел: район мәдәният йорты ремонтланды, Халык иҗаты йорты төзелде, аңа бөек шагыйрь исеме бирелде. Гавриила Романовичның үзенә бюст куелды (скульптор Мәхмүт Газыймов).

Бюст шушы көнне үк ачылды. Татарстан башлыгы фикеренчә, Гавриила Державинның хезмәтләрен аның үзеннән башка беркем дә шул хәтле югары күтәрә алмый - ул үзе сүз остасы, тирән фәлсәфи фикер иясе, бөек гражданин һәм дәүләт эшлеклесе. Митингта тантанага килгән Россия юстиция министры урынбасары Евгений Сидоренко чыгыш ясады. Лаешлыларның атаклы якташы Россиядә беренче юстиция министры һәм либераль реформалар тарафдары булган бит.

Моннан дүрт ел элек Лаеш районы хакимияте һәм Татарстан Язучылар берлеге Державин исемендәге әдәбият премиясен гамәлгә куйды. Үзенең чыгышында Минтимер Шәймиев әйткәнчә, хәзер бу премиянең статусын күтәрергә, аны дәүләт премиясе, ихтимал, Россия премиясе яки халыкара премия итәргә кирәк. Бу турыда сүз куешулар бар инде. Быел Державин премиясенә "Зимние арабески" шигырьләр җыентыгы өчен шагыйрә Лилия Газизова лаек булды.

Аннары 19 ай эчендә төзелгән Халык иҗаты йорты ачылды. Әйтергә кирәк, аның нигезенә беренче ташны Минтимер Шәймиев салган иде.
Иҗат йортын ачу тантанасына соңга калып килгән "Татарстан" поездыннан мәскәүлеләр делегациясе килде. Шагыйрә Римма Казакова Гавриила Державинны рус һәм татар халыкларын берләштерүче символик фигура дип атады. Аның фикеренчә, илдә Державин дәвере аяк баса. Бөек шагыйрь һәм гражданинны ил хәтеренә нәкь менә Татарстан кайтарды һәм бу хәл шагыйрәнең күңелен нечкәрткән.

Иҗат йортында яшь сәләтләр - җырчылар һәм биючеләр, рәссамнар, музыкантлар осталыкка ирешер. ТР вице-премьеры Зилә Вәлиева аларның барысына да иҗат уңышлары теләде.

Кызыл тасманы кисеп, кунаклар шагыйрьнең бүлмә - музее экспонатлары белән танышты, заманында Олонец губернасы, Тамбов губернасы губернаторы, юстиция яшерен советнигы булып хезмәт иткән Г. Державин биографиясен тагын бер кат искә төшерделәр.

Шагыйрьнең халыкка һәм патшаларга һәрвакытта да хакыйкатьне әйткәне өчен үзен данга лаеклы дип санавы турындагы сүзләре бик актуаль яңгырады. Бүлмә - музейда М. Шәймиев Абруйлы кунаклар китабында язу язып калдырды. Тантанада ТР Дәүләт Советы Рәисе урынбасары, шагыйрь Роберт Миңнуллин, министрлык һәм ведомство җитәкчеләре, республика иҗат берлекләре җитәкчеләре, әдипләр катнашты.