Татарстан Президенты: "Иң мөһиме - кешеләрнең сәламәтлеге"

Бүген Казанда ТР сәламәтлек саклау учреждениеләренә 110 санитар автотранспорт чарасы тапшырылды.

Яңа автомобиль ачкычларын ТР Президенты Минтимер Шәймиев, ТР сәламәтлек саклау министры Айрат Фәррахов, Казан мэры Илсур Метшин һәм Казанның Сәламәтлек саклау идарәсе башлыгы Рамил Әхмәтов тапшырды.

Әлеге реанимобильләр ярдәмендә табиблар Татарстанның меңләгән гаиләсенә тормыш, бәхет һәм сәламәтлек бүләк итә ала. Республика сәламәтлек саклау учреждениеләренә барлыгы 243 берәмлек санитар автотранспорт сатып алынды. Машиналар Татарстанда "Соллерс" компаниясендә җитештерелгән.

Машиналарны тапшыру тантанасында чыгыш ясаган республика башлыгы болай дип ассызыклады: "Иң мөһиме - кешеләрнең сәламәтлеге. Халыкка һәрьяклап, сыйфатлы һәм югары технологияле медицина ярдәме күрсәтү - безнең төп бурыч".

ТР Президентының сүзләренә караганда, кризистан соң Татарстан куәтле старт алачак, чөнки моңа тиешле нигез булдырылган. "Бу моннан 19 ел элек Татарстанның дәүләт суверенитеты турында Декларация кабул итү нәтиҗәсендә мөмкин булды. Без аны ышанычлы рәвештә гамәлгә ашырабыз, моның Россия Федерациясен ныгытачагын һәм халыкның яшәү сыйфатын яхшыртачагын яхшы беләбез", - диде Минтимер Шәймиев.

Кризис шартларында Чаллыда Югары технологияле медицина үзәген төзү дәвам итте.

"Республика медицина учреждениеләрендә заманча җиһазлар урнаштыруны дәвам итәчәкбез, - дип вәгъдә бирде республика башлыгы. - Табиблар һәркайсыбызның сәламәтлеге хакына тырышып эшләргә тиеш".

Үз чыгышының ахырында Татарстан Президенты тантанада катнашучыларның һәркайсын якынлашып килүче Республика һәм шәһәр көне белән котлады.

Журналистларга биргән интервьюсында ТР сәламәтлек саклау министрлыгының беренче урынбасары Гадел Юнысов белдергәнчә, 243 машинаны сатып алу өчен 308 миллион сум акча тотылган: аларның 70 проценты - федераль үзәктән, 30 проценты республика бюджетыннан бүлеп бирелгән.

"Быелның ахырына кадәр без федераль үзәктән С классындагы тагын 26 реанимобиль алырга ниятлибез. Алар М-7 трассасында килеп чыккан юл-транспорт һәлакәтләрендә зыян күрүчеләрне травматология үзәкләренә китерү өчен хезмәт итәчәк", - диде Гадел Юнысов.

Искәртеп узабыз, агымдагы елның маенда Россия Федерациясе Төбәкләр үсеше министрлыгы һәм Татарстан Республикасы Министрлар Кабинеты федераль бюджеттан республика бюджетына 2009 елда автотранспорт чаралары һәм коммуналь техника сатып алу өчен субсидия бүлеп бирү турында килешү төзеде. Аның кысаларында, ТР Сәламәтлек саклау министрлыгы мәгълүматларына караганда, Татарстан медицина учреждениеләре эшчәнлеген тәэмин итү өчен 243 берәмлек санитар автотранспорт сатып алу планлаштырылган. Бу - "Fiat Ducato" маркалы 188 ашыгыч медицина ярдәме күрсәтү автомобиле, "Fiat Doblo Panorama" маркалы участок хезмәте өчен 45 күп функцияле автомобиль һәм "Fiat Doblo Panorama" маркалы участок хезмәте өчен носилкалы 10 күп функцияле автомобиль. Ашыгыч медицина ярдәме күрсәтү автомобильләренә иң яхшы медицина җиһазлары урнаштырылган.