Импортны алыштыру - кризиска каршы чара

23 июньдә ТР Министрлар Кабинетында "Импортны алыштыру - Россиядә кече һәм урта эшкуарлыкны үстерүдә яңа юнәлеш" дигән кече һәм урта эшкуарлык форумы ачылды. Форумны ТР Хөкүмәте һәм "ОПОРА Россия" Гомумроссия кече һәм урта эшкуарлык иҗтимагый оешмасы үткәрә.

Форумда Татарстан Республикасы Премьер-министры Рөстәм Миңнеханов, Россия Федерациясе Икътисади үсеш министрлыгының Икътисадта дәүләти җайга салу департаменты директоры Андрей Шаров, ОПОРА Россия" Гомумроссия кече һәм урта эшкуарлык иҗтимагый оешмасы президенты Сергей Борисов, Россиянең бөтен төбәкләреннән килгән кече һәм урта эшкуарлык вәкилләре катнашты. Татарстанның меңнән артык эшкуары чарада видеоконференция режимында катнашты.

Рөстәм Миңнеханов үзенең чыгышында билгеләп үткәнчә, бүген форумда импортны алыштыруга бәйле актуаль мәсьәләләр хакында фикер алышыначак. Һәр төбәкнең әлеге тема буенча әйтер сүзе бар һәм бу өлкәдә тырышлыкларны берләштерергә кирәк. Икътисади кризис шарталрында экспорт түбән тәгәрәде, күп кенә предприятиеләрнең продукциясе эчке базарга йөз тота. "Безнең форум кече һәм урта эшкуарлык үсеше өчен җитди этәргеч бирер дип өметләнәм", - диде ТР Хөкүмәте башлыгы.

"Импортны алыштыру темасы - икътисади кризис чорында аеруча актуаль", - дип ассызыклады Сергей Борисов. Аның сүзләренә караганда, элекке елларда Россия чит ил тауарларына яхшы тормыштан ишекләрне каерып ачмады. Хәзерге вакытта Россия предприятиеләренең үсеше өчен шартлар тудырырга кирәк.

Сергей Борисовның сүзләренә караганда, сертификатлаштыруның артык катлаулы һәм төбәк базарларының ябык булуы эшкуарлыкны үстерүдә тоткарлаучы факторлар санала. "ОПОРА России" оешмасы башлыгы дәүләт сатып алулары буенча электрон сәүдәне оештыруда Татарстанның уңай тәҗрибәсен билгеләп үтте. Аның сүзләренчә, бу тәҗрибәне Россиянең башка төбәкләренә дә таратырга кирәк. Сергей Борисов кризис шартларында "Мастер" Кама индустриаль паркының уңышлы эшләвен аерым билгеләп үтте.

"Импортны алыштыру - Россиядә кече һәм урта эшкуарлыкны үстерүдә яңа юнәлеш" форумы кысаларында кече һәм урта эшкуарлыкка ярдәм күрсәтүдә инфраструктураны үстерү, кече һәм урта бизнеска финанс ярдәме күрсәтү, импортны алыштыручы производстволар өчен технологик җиһазлар эшләүгә бәйле мәсьәләләрне тикшерү күздә тотыла.