Минтимер Шәймиев: "Мирза Мәхмүтов - республикага хезмәт итү үрнәге"

27 мартта Казанда, ТР Фәннәр академиясе бинасында 25 март көнне вафат булган ТР Фәннәр академиясенең хакыйкый әгъзасы, Татар АССРның элеккеге мәгариф министры Мирза Мәхмүтов белән хушлашу булды.

Мәгариф өлкәсендәге иң танылган эшлеклеләрнең берсе белән бәхилләшергә 700дән артык кеше җыелган иде. Алар арасында рәсми затлар, хезмәттәшләре, укучылары, дуслары һәм туганнары бар иде. Табут янында почетлы каравылда ТР Президенты Минтимер Шәймиев, ТР Премьер-министрының беренче урынбасары Равил Моратов, ТР Дәүләт Советы Рәисе урынбасары Александр Гусев, ТР мәгариф һәм фән министры Наил Вәлиев һәм башкалар торды.

"Мондый улы белән бөтен татар халкы горурлана, - диде Татарстан Президенты сүз алып. - Аның барлык эшләре хөрмәткә лаек. Икебез дә республика Хөкүмәте министрлары вазифасын башкарган чорда миңа аның хезмәттәше булырга туры килде. Ул чын мәгънәсендә җитәкче иде".

Минтимер Шәймиев: "Ватан һәрвакыт Мирза Мәхмүтов казанышларын югары бәяләде, башкача булырга да мөмкин түгел", - дип ассызыклап үтте. "Ул зыялы һәм укымышлы кеше иде, - дип саный республика башлыгы. - Хәзер без аның истәлеген мәңгеләштерү хакында уйлаячакбыз".

"Тирән белем һәм зур тормыш тәҗрибәсенә ия, берничә тел белгән мондый министрны, шәхесне бөтен кешегә үрнәк итеп күрсәтергә була, - дип дәвам итте ТР Президенты. - Мирза Исмәгыйль улы һәрчак киләчәккә карап яшәде. Бу аның күп очракта хаклы булуын күрсәтте. Мирза Мәхмүтов - Республикага хезмәт итү үрнәге. Без һәрчак аны олылап искә алачакбыз".

Академик Роальд Сәгъдиев: "Казанга дусларны күрергә килгән вакытта мондый вакыйгада катнашырмын дип һич тә уйламаган идем. Мин Мирза Мәхмүтов белән горурланам. Ул безнең "татар Луначарские", республикада аң-белем тарату өчен күп нәрсәләр эшләде. Без һәрчак аның истә тотарга тиеш", - дип белдерде.

Җеназада ТР мәгариф һәм фән министры Наил Вәлиев, ТР Фәннәр академиясе президенты Әхмәт Мазгаров, республиканың элеккеге мәгариф министры, хәзерге Россия Мәгариф академиясе директоры Фарис Харисов һәм башкалар чыгыш ясады.