"Алтын мөнбәр" студентларны да эшкә җикте

V халыкара мөселман кинофестивале студентларны да эшкә җикте. Казанның алты вузыннан 80ләп студент, алар арасында чит илдән килеп укучылар да бар, волонтер-тәрҗемәче булырга кастинг үтте.

Кастингта инглиз, француз, немец, гарәп, төрек яки фарсы телләрен белгән теләсә кем катнаша ала иде. Аларны алты педагог җиз иләктән үткәрде. Нәтиҗәдә "Алтын мөнбәр" 21 кешене эшле итте. Аларның алтысы инглиз, дүртесе – гарәп, өчәр кеше немец, француз, төрек телләрен су кебек эчә, икесе фарсы телен белә. Фестивальгә җыелган чит ил кунаклары белән аралашуда кыенлык булмаячак, дип ышандыра оештыручылар.

Кунакларга килгәндә, аларның исемлеге инде тәгаенләнгән. Болар чит ил йолдызларыннан Кэри Хироюки Тагава, Ассанте Арманд Антони, Иалгашев Эркен, Резаи Панахбархода Садегхали, Бәкмөхәммәди Фатыйма Надали, Борис Грачевский.

Мөселман киносы фестиваленең ачылу тантанасына Россия мөфтиләр шурасы рәисе, мөфти Равил Гайнетдин киләчәге дә билгеле. Фестивальдә аңа багышланган документаль фильм күрсә-теләчәк.

Фестивальнең беренче көннәрендә исә төрек кинолары старт алачак. Бу уңайдан "Органик", "Корстон", "Мир" кинотеатрларында "Момо", "Нокта", "Адәм поездлары" һәм башка нәфис фильмнар тәкъдим ителә. Төрек фильмнары көннәренә багышланган чарада Әнкара халыкара кинофестивальдән юлланган 17 кеше катнаша. Алар арасында режиссерлар Эриш Акман, Хакан Айтикен, Төркия телерадиокомпаниясенең телевидение бүлеге җитәкчесе Бюлент Ата да бар. Шушы чара кысаларында фоторәссам Ибраһим Демирель "Корстон" үзәгендә шәхси күргәзмәсен оештыра. Ә фильмнарга килгәндә, "Адәм поездлары" фильмы әхлак һәм намус төшенчәләрен алга сөрсә, "Момо" дигәне энесенә әти дә әни дә, галим дә булып торган тугыз яшьлек малай хакында. Әнә шул рәвешле төрки дөнья безгә күңел кылларына тия торган әхлакый һәм тәрбияви кинопродукция алып килә. Әйтергә кирәк, "Алтын мөнбәр" мөселман киносы фестивале быел Татарстан мөселманнарына күңелле вакыйгаларны мулдан әзер-ләгән. Мөселман киеме дизайнерларының "Islamic-clothes" халыкара бәйгесе дә шул чараларга керә. Аны 3 октябрьдә "Корстон" үзә-гендә күреп була.