Казан табиблары аз инвазияле операцияләр ясый

14 сентябрь Төбәкара клиника-диагностика үзәгендә кан тамырлары хирургиясе бүлеге башлыгы Игорь Игнатьев җитәкчелегендә ике чиратсыз операция ясала.

Беренче операцияне торакоскопия операцияләренең "алтын мисалы" дип атарга була. Торакоскопик симпатэктомия, ягъни вегетатив нерв системасының симпатик өлешендәге берәр элементны кисеп алу операциясе, аз инвазияле хирургия ысулы булып санала. Аның ярдәмендә гипергидроз күренешен - уч төбенең артык тирләвен бетерергә мөмкин була. Әлеге хәл күп вакытта Рейно синдромы белән бәйле. 100 процент очракта операция уңай нәтиҗә бирә. Бу юлы хирургия ярдәменә 27 яшьлек кыз мохтаҗ. Гадәттә, операциядән соң пациент икенче көнне инде аякка баса һәм тулы канлы тормыш алып бара.

Икенче операция комплекслы хирургия ысулы булып тора. Аның барышында корсак аортасына протез куела, бөер артериясе реконструкцияләнә. Бүгенге көндә Төбәкара клиника-диагностика үзәге - Татарстанда шундый операцияләрне үткәрүче бердәнбер үзәк. Быел клиникада шундый 9 операция уздырыла. Бу юлы 60 яшьлек ир кешегә классик стентлаштыру операциясен ясарга мөмкин булмаганга, табиблар аңа махсус операция ясаячаклар. Моңа кадәр авыруга башка клиникаларда операцияләр ясалган була инде. Әмма нәтиҗә үзен акламый. Ялгышлыкларны төзәтергә Төбәкара клиника-диагностика үзәге белгечләре алына, дип хәбәр итә клиниканың матбугат хезмәте.