Әхмәт Эргин: “Казанда яратып һәм теләп эшләдем”

Казан Кремлендә ТР Президенты Минтимер Шәймиев Төркия Республикасының Казандагы Генераль консулы Әхмәт Эргин белән аның җәмәгатен кабул итте.

Очрашуда ТР Президентының халыкара мәсьәләләр буенча киңәшчесе – Тышкы элемтәләр департаменты директоры Тимур Акулов та катнашты.

2009 елның сентябрендә Әхмәт Эргин Төркия Республикасының Казандагы Генераль консулы вазыйфасында үз эшен төгәлләде. Ул бу вазифага 2007 елның декабрендә билгеләнгән иде. 2003–2007 елларда ул Төркия илчелегенең РФдагы беренче секретаре һәм Төркия илчелегенең РФдагы киңәшчесе вазифаларын башкарды.

Әхмәт Эргин республиканың иҗтимагый һәм мәдәни тормышында актив катнашты, Татарстан-Төркия мөнәсәбәтләрен үстерү өчен күп эш башкарды. Ул Россиядә Төркия мәдәнияте елы кысаларында Төркия Президенты Абдуллах Гюльнең Татарстан Республикасына визитын һәм шул уңайдан күп кенә чаралар һ.б. оештырды.

“Минем Россиядәге 6 еллык миссиям тәмамлана, шуларның ике елы Төркия Республикасының Казандагы Генераль консулы вазыйфасында үтте. Мин үземне туган йорттан киткән кебек хис итәм”, - дип белдерде журналистларга Казан Кремлендә очрашу тәмамлангач Эргин әфәнде.

Әхмәт Эргин Татарстан Президентына бүгенге очрашу өчен рәхмәт белдерде. Әлеге очрашуда консулның республикадагы ике еллык эшчәнлегенә нәтиҗә ясалды. Консул Төркия белән Татарстан арасындагы җылы мөнәсәбәттә үткән зур чараларының берсе буларак, бу елның февралендә Төркия Президенты Абдуллах Гюльнең республикага беренче тапкыр визит ясавын билгеләп үтте.

“Төркиягә кайткач Татарстанның “Ак Барс” клубы өчен җан атарга уйлыйсызмы?” дигән сорауга, А.Эргин: “Әлбәттә! Бу хакта Татарстан Президенты белән очрашуда әйттем. 2003 елда мине Мәскәүгә билгеләгәч, мин “Ак Барс” командасы өчен җан ата башладым. “Акбарслылар”га рәхмәтлемен. Алар миңа Казанда чемпионлык хисен кичерергә ярдәм итте”, - диде.

Консул кечкенә серен дә ачты: ул “Ак Барс” җиңгәч “барслылар” формасын киеп Казан урамнарына бәйрәм итәргә чыккан. Эргин әфәнде яраткан клубының матчларын Морозов һәм Зарипов фамилияләре язылган яшел-ак форма киеп карага ярата икән.

Консул сүзләренчә, аны Казанда Төркия илчелегенең Мәскәүдәге тәҗрибәле вәкиле алыштырачак. Аның фикеренчә, башка илдә уңышка ирешүнең сере, нәкъ менә эшләргә бара торган урынны ярату. “Казанда үз эшчәнлегемне яратып һәм теләп алып бардым”, – дип белдерде Әхмәт Эргин.