ТР Мәгариф һәм фән министры Альберт Гыйльметдинов 1 сентябрь – Белем көне белән котлады

ТР Мәгариф һәм фән министры Альберт Гыйльметдинов педагогларны һәм укучыларны 1 сентябрь – Белем көне белән котлады.

“Хөрмәтле коллегалар һәм кадерле балалар! Сезне чын күңелемнән 1 сентябрь – Белем көне белән котлыйм. Иң беренче чиратта, бу - мәктәпкә тәүге тапкыр баручыларның бәйрәме. Бүгенге көндә Татарстанның 36 мең яшь кешесе яңа мәктәп тормышын зарыгып көтә. Аларны мәктәп янында беренче остазлары шулай ук дулкынланып көтә. Хәзерге вакытта республикада 9 301 башлангыч сыйныф укытучысы исәпләнә”, - диелә котлауда.

“Минемчә, күп укучылар өчен яңа тормыш календарь елдан түгел, ә яңа уку елыннан башлана. Кадерле укучылар, студентлар, бу вакытта сез үзегезгә зур тырышлык белән укырга һәм биеклекләрне яуларга сүз бирәсез. Бу вакытта без – өлкәннәр, педагоглар үзебезгә һәм сезгә югары омтылышларыгызны хупларга сүз бирәбез. Хәзер республикада белем алу һәм даими камилләшү өчен уңайлы вакыт.

Республикада менә дүртенче ел инде Татарстан Хөкүмәтенең “Алгарыш” грантлар программасы актив тормышка ашырыла. 2008-2009 уку елында Россия һәм чит ил университетларында 492 кеше стажировка уза һәм белем ала алды. Аларның 131е – студентлар, аспирантлар һәм яшь галимнәр.

Без балаларыбызның белемнәргә һәм яңа ачышларга омтылуын күрәбез. Татарстан балалары “Милләт хәзинәләре”, “Россия киләчәге” бәйгеләрендә, укучыларның бөтенроссия олимпиадаларында уңышлы чыгыш ясавын күрәбез.

Кадерле балалар! Сезгә энтузиазмыгызның саекмавын телим! Педагогларга укучыларының күзләре һәрвакыт нур чәчеп торуын телим. Яңа уку елында бәхет, зур куңышлар телим”, - диелә тәбрикнамәдә.