Казанда Электрон Хөкүмәт проектын төзүдә ТР тәҗрибәсен өйрәнүгә багышланган киңәшмә узачак

Татарстан башкаласына эш сәфәре белән РФ Премьер-министры урынбасары - РФ Хөкүмәте аппараты җитәкчесе Сергей Собянин килде. Аның визит программасында Федераль теркәү хезмәтенең ТР идарәсендә, "Идея" технопаркында булу, югары технологияләр өлкәсендә технопаркның (ИТ- парк) төзелеш мәйданы белән танышу каралган. Моннан тыш, кунакка ТР Мәгълүмат технологияләре үзәге базасында әле быел гына төзелгән Космик хезмәтләр буенча төбәк үзәге презентацияләнәчәк.

Көннең икенче яртысында ТР Министрлар Кабинетында Сергей Собянин рәислегендә "Электрон Хөкүмәт проектын төзү буенча Татарстан тәҗрибәсе һәм федераль башкарма хакимият органнарының гражданнарга, оешмаларга инфокоммуникация технологияләрен кулланып хезмәт күрсәтү буенча эшчәнлеге" дигән темага күчмә киңәшмә узачак. Киңәшмә эшендә РФ элемтә һәм массакүләм коммуникацияләр министры Игорь Щеголев, РФ эчке эшләр министры Рәшит Нургалиев, икътисади үсеш министры урынбасары Анна Попова, мәгариф һәм фән министры урынбасары Владимир Миклушевский, РФ Пенсия фонды идарә рәисе Антон Дроздов, Федераль салым хезмәте җитәкчесе Михаил Мокрецов, Федераль миграция хезмәте директоры Константин Ромадановский һ.б. җаваплы затлар катнаша.

Киңәшмәдән соң, ТР Министрлар Кабинеты, Федераль теркәү, кадастр һәм картография хезмәте, РФ Пенсия фонды арасында Татарстан территориясендә электрон хезмәтләр күрсәтү буенча тәҗрибә проектларын гамәлгә ашыру турында килешүләр имзалау ниятләнә.