Татарстан Республикасы Дәүләт Советы Рәисе Ф.Х.Мөхәммәтшинның Россия Федерациясе Дәүләт флагы көне белән котлавы

Кадерле татарстанлылар! 22 августта без Россия Федерациясенең Дәүләт флагы көнен билгеләп үтәбез. Россия әләменә тугрылык, аны хөрмәт итү ике гасыр дәверендә чын патриотларга хас сыйфатлар булып саналган. Аклы-зәңгәрле-кызыллы флаг астында Россиянең дәүләтчелеге үсте һәм ныгыды, илебезнең бай елъязмасы язылды. Озак еллар онытылып торганнан соң, Ватаныбызның үткәнен һәм бүгенгесен бәйләүче җепне яңартып, 1993 елда Россия флагының кабат дәүләт статусы алуы – безнең өчен сөенечле хәл.

Бүген дә Россия халкы үзенең өч төсле байрагы астында демократик федератив дәүләт төзи, аның икътисадый үсеше һәм социаль яктан камилләшүе өчен кирәк¬ле шартлар тудыра. Россия флагы белән фәндә, мәдәнияттә, спортта яңа җиңүләр яулана. Ә иң мөһиме: Россия флагы кешеләрдә патриотлык хисләре уята. Россия халкы шатлыкны да, көенечне дә иле белән уртаклашырга тели. Дәүләт флагы бәйрәмнәрдә дә, көндәлек тормышта да бу берләшүнең символы булып тора. Әлеге рухи күтәрелеш дәүләт тарафыннан да яклау тапты: үткән елның ноябрь аенда Дәүләт Думасы Федераль конституциячел законга берничә үзгәреш кертте. Хәзер Россия гражданнары Дәүләт флагын яисә аның сурәтен рәсми рөхсәттән башка да куллану хокукына ия. Ниһаять, без башка илләрдә милли тантаналар, халыкара спорт ярышлары вакытында шатланган халык төркемнәренең патриотлык хисләрен үзләренең милли флаглары ярдәмендә белдерүенә кызыгып караудан туктарбыз. Хәзер безнең дә моңа законлы хокукыбыз бар. Илебез һәм ватандашларыбыз белән горурлану өчен нигезләр дә аз түгел. Үтелгән юлның кыенлыкларына һәм бүгенге проблемаларга карамастан, Россия Федерациясе куәтле һәм бөек держава булды һәм шулай булып калачак.

Бәйрәм белән сезне, кадерле татарстанлылар!

Россия әләме безнең данлы күпмилләтле Ватаныбыз өстендә һәрвакыт шулай горур җилфердәсен!