Казанда Болгар мәдәнияте фестивале узачак

3-19 сентябрьдә Россиядә Болгар мәдәнияте фестивале узачак. Аның кысаларында 10 сентябрьдә Казан Идел елгасы буйлап "Илья Репин" теплоходында сәяхәт кылган Болгар сәнгать осталарын каршылаячак.

Russia-bulgaria.ru сайты биргән мәгълүматка караганда, Болгар мәдәнияте фестивален Россиядә Болгария елы кысаларында РФ һәм Болгария Республикасы мәдәният министрлыклары оештыра. Болгариянең 100дән артык сәнгать остасы, "Илья Репин" теплоходына утырып, Идел буйлап Мәскәү, Углич, Ярославль, Түбән Новгород, Чабаксар, Казан, Тольятти, Сызрань, Самара, Сарытау, Волгоград һәм Әстерхан калаларына сәфәр кылачак. Анда Болгария мәдәниятен танытучы чаралар узачак дип көтелә.

Болгария кунаклары туктаган һәр шәһәрдә "Болгарлар" дип аталган гала-концертлар оештырылачак. Анда милли инструменталь, бию композицияләре, заманча музыка, хореография сәнгате, традицион вокал әсәрләре тәкъдим ителәчәк. Программада Найден Кировның фольклор бию театры, "StringS" скрипкачылар ансамбле, "EVA квартет" вокаль коллективы, "Веда Джуниор" заманча балет театрын солистлары чыгышын күреп булачак. Программада шулай ук "Россия һәм Болгария гаммәви мәгълүмат чаралары вәкилләре арасында әңгәмә" дигән проект чаралары да каралган.

Теплоходта сәяхәт кылачак халык һөнәрчелеге осталары Россия төбәкләре халкын милли курчаклар ясау, балчыктан ясалган савытларны бизәү, хатын-кызларның бизәнү әйберләрен ясау серләре белән таныштырачак дип уйланыла.