Казан мэриясендә Бердәм имтихан тапшыру нәтиҗәләрен яхшырту турында фикер алыштылар

"Бердәм дәүләт имтиханы күп нәрсәне үз урынына куйды. Ул - балаларның әзерлеген күрсәтә торган фактор", - дип белдерде бүген Казан мэры Илсур Метшин эшлекле дүшәмбе киңәшмәсендә.

Узган уку елында Казанда Бердәм дәүләт имтиханын тапшыру нәтиҗәләре белән танышкач, шәһәр башлыгы үзенең канәгатьсезлеген яшермәде. Республика күләмендә теге яки бу предмет буенча 100 балл җыйган укучыларның яртысы Казанга туры килсә дә, мәҗбүри саналган математикадан 155 укучы (барлык имтихан бирүчеләрнең 2,3 проценты) һәм рус теленнән 156 укучы (2,3 процент) сынауны бөтенләй тапшыра алмаган. Кара исемлектә - Идел буе, Авиатөзелеш һәм Совет районнары. Илсур Метшин әлеге район башлыкларыннан имтиханнары ничек шулай начар тапшырылу сәбәпләрен сорашты. Авиатөзелеш районы башлыгы Сергей Батин сүзләренчә, икеле алганнарның күпчелеге - кичке мәктәпләрдән. Сүз уңаеннан шуны әйтергә кирәк: 2009 елда сынау тоткан 7906 кешенең бер меңгә якыны кичке мәктәпләрдә белем алган.

Илсур Һадиуллин хәбәр иткәнчә, көндезге мәктәпләрдә белем алучы укучыларның рус теле, математика, информатика, химия, биология, физика, рус әдәбияты, җәмгыять белеме, Россия тарихы, инглиз һәм немец телләре буенча күрсәткечләре гомумреспублика күрсәткечләреннән яхшырак, ә география һәм француз теленнән - түбәнрәк.

БДИ нәтиҗәләрен анализлаганнан соң, күрсәткечләрнең түбән булуын Казан шәһәре Мәгариф идарәсе уку планының үзенчәлегендә, югары сыйныфларда берни белән кызыксынмый торган укучыларның укуында, укыту-методик комплектларының БДИга әзерләү өчен юнәлтелмәгән булуында, укытучыларның хәзерлегендә, балаларның психологик яктан нәзберек булуында дип тапканнар.

Сынау нәтиҗәләрен яхшырту юлларын бүген мэриядә бергәләп эзләделәр. Илсур Метшин сүзләренчә, классик укытучылар белән яңа методикаларга нигезләнеп эшли торган педагоглар арасында "алтын урталыкны" табу зарур. Мэр И.Метшин Илсур Һадиуллинның муниципаль методик хезмәтләрне яңартып кору тәкъдимен хуплап каршы алды. "Без үз алдыбызга амбициоз бурычлар куярга - бөтен республикага үрнәк булырга тиешбез", - диде шәһәр башлыгы, Санкт-Петербург һәм Мәскәү кебек Россия шәһәрләренә йөз тотып эшләргә кирәклеген ассызыклап.