9 - 11 сентябрь көннәрендә Казанда "Нефть, газ. Нефть химиясе" традицион күргәзмәсе узачак

Нефть, газ секторы аналитиклары, эшлекле даирә вәкилләре, федераль һәм төбәк хакимиятләре җитәкчеләре, тармак предприятиеләренең топ-менеджерлары сентябрь аенда Казанга халыкара "Нефть, газ. Нефть химиясе" махсуслаштырылган күргәзмәсенә җыелачак. Әлеге традицион чара быел ТР Президенты һәм Хөкүмәте булышлыгында 16 нчы тапкыр оештырыла. Күргәзмә барган көннәрдә биредә үк "Россия нефть-газ комплексында техник регламентларны гамәли куллану" дигән IV халыкара конференция эшләячәк.

Нефть, газ, химия комплексы предприятиеләрен җиһазландыруда һәм технологик инфраструктураны үстерүдә мөһим роль уйнаучы күргәзмә тармакта эре һәм кече предприятиеләрнең үзара хезмәттәшлегенең конструктив формаларын киңәйтергә, фәнни потенциалны үстерүгә ярдәм итә. Ул ел саен Россиянең һәм чит илләрнең 200 дән артык әйдәп баручы компаниясен үзенә җыя. Узган ел да анда 200 дән артык предприятие һәм оешма үз эшләнмәләрен, яңа технологик проектларын тәкъдим иткән иде.

"Нефть, газ. Нефть химиясе" күргәзмәсен аның төп экспонентлары булган эре нефть-газ комплексы предприятиеләреннән башка күзаллап булмый. Алар арасында даими катнашучылар - "Татнефть", "Казан органик синтез", "Түбән Кама нефтехим", "Түбән Кама шин", ТАИФ-НК, "Транснефть" (Мәскәү) җәмгыятьләре дә бар. Шулай ук "РИТЭК", "ЮМО", "Самсон Контролс", "ГРАСИС" җәмгыятьләрен, "Иокогава Электрик БДБ" җәмгыятенең филиалын һ.б. күрергә мөмкин булачак. Быел да экспозицияләрдә нефть һәм газ ятмаларын үзләштерүдә кирәкле җиһазлар, авыр үзләштерелүче "кара алтын" запасларын табу технологияләре, нефть эшкәртү, нефть химиясе һәм химия тармакларында җитештерелгән продукция тәкъдим ителәчәк.

Нефть һәм газ сәнәгатенең актуаль проблемалары 9-11 сентябрь көннәрендә "Россия нефть-газ комплексында техник регламентларны гамәли куллану" дигән IV халыкара конференциядә күтәреләчәк. Аны Россия Сәнәгатьчеләр һәм эшмәкәрләр берлеге, РФ Сәнәгать һәм сәүдә министрлыгы, Техник җайга салу һәм метрология буенча федераль агентлык, ТР Сәнәгать һәм сәүдә министрлыгы, Россиянең нефть, газ комплексында стандартлаштыру һәм техник җайга салу буенча тармакара совет оештыра. Конференция эшендә Россиядән, якын һәм ерак чит илләрдән 300 дән артык делегат катнашыр дип көтелә. Алар арасында Стандартлаштыру өлкәсендә дөньякүләм танылган белгечләр, БМО ның Ауропа экология комиссиясе җитәкчелеге, илнең һәм дөньяның әйдәп баручы нефть-газ компанияләре җитәкчеләре һ.б. булачак. Техник регламентларны гамәлдә куллану конференциядә күтәрелә торган төп мәсьәләләрнең берсе булачак. "Биналарның һәм корылмаларның иминлеге", "Янгын куркынычсызлыгы буенча таләпләр", "Автомобиль һәм авиация ягулыгы, дизель һәм суднолар ягулыгына таләпләр" әнә шундыйлардан. Конференциядә катнашучылар "Стандартлаштыру турында" федераль канун әзерләнү сәбәпле, чиктәш законнарга үзгәрешләр кертү, нефть-газ компанияләренең Россия, БМО ның Ауропа икътисади комиссиясе, ЕврАзЭс ның техник регламентларын эшләүдә катнашуы мәсьәләсен дә күтәрергә җыена.