16 августта Казанда III Мөселман яшьләре фестивале үз эшен тәмамлады

Казанда Кол Шәриф мәчетендә дүшәмбе көнне - 10 августта ачылып киткән III Мөселман яшьләре фестивале бүген башкаланың Мәрҗани мәчетендә үз эшен тәмамлады. Гомумроссия масшабындагы чара исемен алган, быел Болгар шәһәрендә узган фестивальдә быел 30 төбәктән йөздән артык егет һәм кыз катнашты. 2008 елда исә Татарстаннан һәм Россиянең 25 төбәгеннән йөзгә якын вәкил әлеге форумда фикер алышкан иде.

Беренче тапкыр 2007 елда Татар яшьләре көннәре кысаларында узган фестиваль икенче тапкыр инде мөстәкыйль чара буларак оештырылды һәм Россия Федерациясендә яшәүче мөселман яшьләрен берләштерү, үзара эшлекле элемтәләрне җайга салуны күз алдында тоткан иде.

Быел фестивальне оештыруда ТР Яшьләр эшләре, спорт һәм туризм министрлыгы, ТР Министрлар Кабинеты кармагындагы Дин эшләре идарәсе, ТР Мөселманнары Диния нәзарәте, "Идел" яшьләр үзәге, татарларның федераль милли-мәдәни мохтарияты катнашты.

Оештыручылар хәбәр иткәнчә, быелгы фестивальнең программасы бай эчтәлекле итеп төзелгән. Программага күренекле дин әһелләре, хәзрәтләр - Җәлил хәзрәт Фазлыев, Илдус Фәизов, Мәхмүт Шәрәфетдинов, Әлбир Крганов, галимнәр һәм дәүләт эшлеклеләре белән очрашулар кертелгән иде. Фестивальдә шулай ук ТР Министрлар Кабинетының узган елның декабрь аенда чыккан карары нигезендә кабул ителгән "2009-2011 елларда Татарстан Республикасында экстремизм һәм террорчылык профилактикалау" буенча максатчан программасы кысаларында, әлеге проблемага да игътибар бирү күздә тотыла дип хәбәр ителде.

Бүген фестивальнең ябылу тантанасында ТР Министрлар Кабинеты карамагындагы Дин эшләр идарәсе башлыгы Ринат Вәлиуллин, Мәрҗани исемендәге мәчетнең имам-хатыйбы Мансур хәзрәт Җәләлетдинов, "Идел" яшьләр үзәге җитәкчесе Миләүшә Шәрәпова катнашты. Хәзрәт, яшьләргә нәсыйхәт биреп, үз артларыннан тагын да күбрәк яшьләрне ияртергә, аларны мәчетләргә алып килергә һәм намазга бастырырга өндәде. М.Җәләлетдинов урыннарда дин әһелләренең яшьләр белән сүлпән эшләвен, балалар җәй көннәрендә тайгак юлга кереп китмәсен өчен, лагерьлар оештырырга кирәклеген ассзыклап үтте. Хәзрәт сүзләренчә, бу яшьләрнең дини уку йортларына керүе мәҗбүри түгел, юрист булсынмы ул, финансистмы - күңелендә иман нуры, үзенең иманлы булуы кадерле.

Ринат Вәлиуллин исә фестивальдә катнашкан яшьләргә биредә туплаган тәҗрибәне алып кайтып таратырга, урыннарда шундый ук чаралар оештырырга һәм вакытлы матбугат битләрендә яктыртырга киңәш итте.