М.Сафиуллин ТРның 2030 елга кадәр үсеш концепциясе стратегиясен эшләү тәкъдиме белән чыкты

14 августта ТР Икътисад министрлыгының киңәйтелгән коллегия утырышында министр Марат Сафиуллин республиканың 2010-2030 елларга үсеш концепциясе стратегиясен эшләү тәкъдиме белән чыкты. "Әлеге программаның кызыксыну белдергән барлык структуралар тарафыннан эшләнүе зарур. Төрле дәрәҗәдәге хакимият тә, предприятиеләр дә, халык та икътисадның кая таба барганлыгын аңларга тиеш. Башка программаларны без әлеге стратегия нигезендә координацияләргә телибез", - дип белдерде ул.

Стратегиядә төп урынны тормыш сыйфатының тиешле дәрәҗәдә булуы һәм эшлекле даирәләрдә конкурентлыкка сәләтлелек алып торачак дип көтелә. "Шул ук вакытта без хәл итәргә тиешле яңа бурычлар һәм килеп туган хәлләргә бәйле критерийлар бар", - диде М.Сафиуллин. Министр санап үткәнчә, аларга брендларны таныту һәм актив тышкы икътисади сәясәт алып бару, ташламалы шартларда алырга мөмкин булган торакка кызыктырып, республика икътисадына башка төбәкләрдән һәм БДБ илләреннән югары әзерлекле белгечләрне тарту керә.

"Бездәге социаль-икътисади сәясәтнең бурычы - кеше Татарстанда үзен якланган һәм уңайлы хис итәргә, аңа монда яшәү һәм эшләү ошарга тиеш. Бу - бик зур миссия. Шуңа күрә безгә талантлар килергә омтылырга - республика бизнес әһелләрен җәлеп итәрлек булырга тиеш", - дип белдерде Марат Сафиуллин. Министр хәзерге вакытта мәгариф һәм торак төзелеше буенча программалар эшләнүен хәбәр итте.

"Безнең икътисадның нигезен нефть табу һәм машина төзелеше тәшкил итә. Бурычыбыз, аңа нигезләнеп, башка секторлардагы эшчәнлекне көйчәйтү", - дип билгеләп үтте икътисад министры.