Казанда музей эшен нәтиҗәле оештыру мәсьәләләре каралачак

7-10 сентябрьдә Казанда Россиянең музей белгечләре өчен музей менеджменты буенча "XXI гасырда музей белән идарә итү" дип аталган Милли тренинг оештырылыр дип көтелә. Әлеге тренингны үткәрүгә үз ярдәмен ЮНЕСКОның Мәсәкүдәге бюросы, гуманитар өлкәдә хезмәттәшлек итүнең Дәүләтара фонды сала. Чара ТР Милли музее, Халыкара музейлар Советының Россиядәге Комитеты тарафыннан оештырыла.

XXI гасырда музей - кешегә аның җәмгыятьтәге урынын билгеләргә ярдәм итүче инструментларның берсе. Дөньяны глобальләштерү, Интернетка чыгу, санлы технологияләр өлкәсендәге яңалыклар тәҗрибә белән алмашуны, эшләүнең яңа ысулларын булдыруны, музей белән идарә итүдә яңа методлар куллануны күздә тота. Шуңа күрә тренингны үткәрү заман таләбенә буйсына.

Тренингка Россиянең төрле өлкәләрендә урнашкан музейларының 30га якын белгече киләчәк. Чара кысаларында музей практикасында туган проблемаларны хәл итү, бүгенге заманда Россиядә музей эшен үстерү мәсьәләләре каралыр дип уйланыла. Тренинглар "Казан Кремле" дәүләт тарихи-архитектур музей-тыюлыгы, ТР Дәүләт сынлы сәнгать музее, Алабуга дәүләт тарихи-архитектур музей-тыюлыгы, Казан дәүләт университеты нигезендә үткәреләчәк.

Тренинглар кысаларында музей эшендә законнарны үтәү, санлы технологияләр, музей җиһазлары, маркетинг, музей туризмы, мәдәни-белем бирү һәм күргәзмә эше өлкәләрендәге белгечләр музей хезмәткәрләренә лекцияләр укыячак, практика дәресләрен оештырыр дип планлаштырыла. "Россия музейлары" рәсми сайтыннан алган хәбәргә күрә, әлеге проект музей эше өлкәсендә белем бирүдә тәҗрибә алышырга һәм музейлар арасында хезмәттәшлекне үстерергә ярдәм итәчәк.