Татарстанда 1,9 миллион тонна ашлык җыеп алынган

Татарстанда 1,9 миллион тонна ашлык җыеп алынган. Бөртекле һәм бөртекле-кузаклы культуралар 734,5 мең гектарда суктырылган, дип хәбәр итә ТР Авыл хуҗалыгы һәм азык-төлек министрлыгының матбугат хезмәте.

Татарстанда 1938,1 мең тонна ашлык җыеп алынган, шуның 440,2 мең тоннасы - көзге арыш, 881,3 мең тоннасы - көзге бодай, 356,4 мең тоннасы - арпа, 52,8 мең тоннасы борчак. Республика игенчеләре шулай ук язгы бодайны урып-җыюга кереште, бүгенге көндә 47 мең тонна язгы бодай суктырылган, уңыш гектарыннан уртача 25,8 центнер тәшкил итә. Тулаем алганда, республикада бөртекле һәм бөртекле-кузаклы культуралар 734,5 мең гектар мәйданда җыеп алынган, бу фаразланганның 44 проценты дигән сүз.

Республикада уңыш гектарыннан уртача 26,4 центнер тәшкил итә. Иң югары уңыш Буа районында - гектарыннан 39,5 центнер. Арча районында әлеге күрсәткеч - 37,5, Актаныш һәм Балтач районнарында 34,5 центнерга тигез. Татарстанның Апас, Минзәлә, Әтнә, Тәтеш, Спас, Нурлат, Әлки, Чүпрәле, Яшел Үзән, Кайбыч, Кукмара, Югары Ослан һәм Биектау районнарында уңыш гектарыннан 30 центнердан да ким чыкмый.

Бүгенге көндә Буа районында - 108,8 мең тонна, Арча районында - 91,5, Нурлат районында - 90,8, Әлки районында - 78,7, Спас районында - 73,9 мең тонна ашлык суктырган. Апас, Питрәч, Тәтеш, Минзәлә, Актаныш, Алексеевски, Чүпрәле һәм Кукмара районнарында суктырып алынган ашлыкның күләме 50 мең тоннадан артып китә.

Яңгырлар аркасында республикада урып-җыю эшләренең темпы кимеде. Бер көндә игенчеләр бары тик 94,9 мең тонна ашлык җыеп ала. Урып-җыю техникасының техник потенциалы 41 процентка гына файдаланыла. Бер комбайн бер көн эчендә 21 тонна ашлык суктыра. Кама Тамагы һәм Спас районнарында исә бер комбайн суктырып алган ашлыкның күләме 50 тоннадан артып китә.