Икътисади зоналарны үстерүгә багышланган чираттагы киңәшмә Чистай районында узды

Республиканың икътисади зоналарын үстерүгә багышланган күчмә киңәшмәләр Чистай районында тәмамланды. Биредә узган киңәшмәдә Кама аръягы зонасына кергән Аксубай, Алесеевский, Әлки, Яңа Чишмә, Нурлат, Спасс, Чистай районнары җитәкчеләре катнашты, дип хәбәр итә Икътисад министрлыгының матбугат хезмәте.

Кама аръягы зонасына кергән территорияләр ягулык, азык сәнәгате, машина төзелеше, төзелеш материаллары җитештерү, энергетика, урман һәм җиңел сәнәгать буенча махсуслашкан. ТР икътисад министры Марат Сафиуллин белдерүенчә, алар икътисады нигезен тәшкил иткән секторлар кризис йогынтысын азрак сизгән. Шул ук вакытта төзелеш күрсәткечләре республика буенча уртача күрсәткечтән калыша. Марат Сафиуллин ассызыклаганча, бүген төзелешнең кризиска каршы куәтле мөмкинлеге бар. Тармакта күпсанлы эш урыннары булу янәшә тармакларның эшчәнлеген тәэмин итәргә дә булыша.

Кама аръягы территорияләренең күпчелеге аграр производствога нигезләнгән. Шул сәбәпле, биредә сәнәгатьтә җитештерү индексы яхшы динамика күрсәтә. Хезмәт хакы буенча да уңай динамика сакланган. "Әмма инфляция процессларын исәпкә алып караганда, реаль хезмәт хакының беркадәр төшүе күзәтелә. Безнең бурыч -халыкның яшәү дәрәҗәсе һәм сыйфатында кризис йогынтысын азрак сиздерү"-, ди министр.

Ул үз чыгышында республикада, ил күләмендә гамәлгә ашырылучы кризиска каршы чаралар программасына җентекләп тукталды. Министр Кама аръягы территорияләре җитәкчеләрен федераль үзәктән финансланучы программалар буенча эшне активлаштырырга чакырды. Аерым алганда, ул иҗтимагый эшләрне оештыру һәм халыкның үз эшен булдыруга кагыла. Министр яңа перспектив производстволар булдыру аша бюджетларның керем өлешен арттыру, алар ярдәмендә халыкны яңа эш урыннары белән тәэмин итүгә аерым игътибар юнәлтте.