РФ һәм ТР Хисап палаталары Универсиадага тотылачак акчаларга бергәләп мониторинг үткәрәчәк

РФ һәм ТР Хисап палаталары 2013 елгы Универсиадага әзерлек эшләренә бүлеп бирелгән бюджет акчаларының сарыф ителүенә бергәләп мониторинг үткәрәчәк һәм контрольдә тотачак.

Агымдагы елның июнендә РФ Хисап палатасы рәисе Сергей Степашин Казанга килгәч, 2013 елгы Универсиадага әзерлек эшләренә бүлеп бирелгән бюджет акчаларының сарыф ителүенә РФ һәм ТР Хисап палаталары белән берлектә мониторинг үткәрү турында килешү төзүгә ирешелде.

5 август көнне Мәскәүдә РФ Хисап палатасы аудиторы Александр Пискунов һәм ТР Хисап палатасы рәисе Алексей Демидов тарафыннан уртак контроль чара үткәрү турындагы карар имзаланды.

2013 елда Казанда Бөтендөнья җәйге универсиадасын үткәрүгә әзерлек эшләренә бүлеп бирелүче бюджет акчаларын сарыф итүне контролдә тоту барышында проект аудиты алымнарын куллану күздә тотыла. Планлаштырылган чараларның үтәлү вакытын, бюджет акчаларының үз вакытында бүленүен һәм үзләштерелүен, башкарыла торган эшләрнең сыйфатын күзәтү ниятләнә. Объектлар төзүнең смета бәясе нигезле булу-булмавын контролдә тотуга аерым игътибар биреләчәк.

Искәртеп узабыз, Универсиада чараларын финанслауга федераль бюджеттан 6,98 миллиард сум акча бүлеп бирелгән инде.