Татарстанга БМО ның сәнәгатьне үстерү буенча оешмасы вәкилләре килде

Казанга БМО ның сәнәгатьне үстерү буенча оешмасының (ЮНИДО) Россиядәге халыкара сәнәгый хезмәттәшлек үзәге вәкилләре килде. Бүген ТР Сәнәгать һәм сәүдә министрлыгында ЮНИДО үзәге директоры Сергей Коротков һәм үзәк эксперты Михаил Никифоров белән очрашу узачак.

Министрлыкның матбугат үзәгеннән хәбәр итүләренчә, кунакларга республиканың икътисади потенциалы тәкъдир ителәчәк, Татарстан предприятиеләренең көндәшлеккә сәләтен күтәрү буенча хезмәттәшлекнең өстенлекле юнәлешләре каралачак. ТР сәнәгатендә энергия һәм ресурсларның нәтиҗәлелеген күтәрү, ISO 9000, ISO 14000, ISO 18000, ISO/TS 16949 халыкара стандартларын кертү аша Татарстан сәнәгать предприятиеләренең конкурентлык сәләтен күтәрү Татарстанның ЮНИДО белән сәнәгатьне үстерү өлкәсендәге хезмәттәшлегенең перспектив юнәлешләре әнә шуннан гыйбарәт.

Очрашуда Татарстанны ЮНИДО ның тәҗрибә проектларына кертү мәсьәләсе дә күтәреләчәк. ЮНИДО вәкилләренең министрлыкның энергетика комплексы һәм энергия саклау, газ инфраструктурасын үстерү һәм ягулык-энергетика ресурслары белән тәэмин итү, машина төзелеше, нефть химиясе, нефть эшкәртү комплекслары кебек тармак бүлекчәләре җитәкчелеге белән аерым очрашулары да каралган.

БМО ның сәнәгатьне үстерү буенча оешмасының Россиядәге үзәге вәкилләренең Татарстанга әлеге эш сәфәрен ЮНИДО белән Татарстан арасында Венада имзаланачак Траст килешүен әзерләүнең бер этабы дип тә бәяләргә була. Үзәк вәкилләренең Татарстанга сәфәре 13 августка кадәр дәвам итә.